Dipika Padukone — Hindiston kinematografiyasida tanilgan mashhur hind aktrisasi. Ajoyib karyeraga ega bo‘lib, u Hindistondagi eng yuqori maosh oladigan aktrisalardan biri sifatida e’tirof etilgan va ko‘plab mukofotlarga, jumladan uchta Filmfare mukofotiga sazovor bo‘lgan. E’tiborga loyiq jihati shundaki, Time jurnali uni 2018-yilda dunyodagi eng mashhur 100 kishidan biri deb tan olgan va 2022-yilda Time100 Impact Award mukofoti bilan taqdirlagan.
-h6wwQG0n.jpg)
Aktrisalikdan tashqari, Padukone o‘zining jamoatchilik ishlari bilan tanilgan, ayniqsa ruhiy salomatlik, feminizm va depressiya haqida xabardorlikni oshirish borasida. U Hindistonda ruhiy salomatlik muammolari bilan shug‘ullanadigan Live Love Laugh jamg‘armasining asoschisidir. Bundan tashqari, u ko‘rsatuvlarda faol ishtirok etadi, gazetalarga maqolalar yozadi, o‘zining ayollar kiyimlari tarmog‘iga ega va turli brendlar hamda mahsulotlarning yuzi sifatida faoliyat yuritadi.
Dipika Padukone 1986-yil 5-yanvarda Daniyaning Kopengagen shahrida konkani jamoasiga mansub oilada dunyoga kelgan. Uning otasi Prakash Padukone o‘tmishda taniqli professional badmintonchi bo‘lgan, onasi Ujala esa sayyohlik agenti sifatida faoliyat yuritadi. Dipikaning Anisha ismli singlisi bor, u golf o‘yinchisi sifatida nom qozongan. Dipikaning bobosi Ramesh Padukone Maysur badminton uyushmasida kotib lavozimida ishlagan, bu esa oilaning sport olamidagi sezilarli o‘rnini ko‘rsatadi.
Dipika atigi bir yoshga to‘lganda, uning oilasi Hindistonning Bangalor shahriga ko‘chib o‘tgan, u shu yerda o‘sib-ulg‘aygan. Sport bilan, ayniqsa badminton bilan bog‘liq bu mustahkam oilaviy aloqa Dipikaga sport sohasida chuqur ildiz otgan poydevor yaratib bergan. Oilasining qo‘llab-quvvatlashi va ta’siri, ayniqsa otasining sport sohasidagi ajoyib yutuqlari Dipikaning hayot va karyera yo‘lini shakllantirishda muhim ahamiyat kasb etgan.
Dipika boshlang‘ich ta’limni Bangalordagi Sofiya o‘rta maktabida olgan va o‘qishini Mount Carmel kollejida davom ettirgan.
Bolaligida Padukonening do‘stlari unchalik ko‘p bo‘lmagan. U yoshligidan badmintonga qiziqqan, milliy darajadagi musobaqalar va chempionatlarda qatnashgan. Bundan tashqari, u beysbol bo‘yicha ham bir nechta davlat miqyosidagi turnirlarda ishtirok etgan. Sportga sodiqligiga qaramay, Padukone yoshligida turli reklama kampaniyalarida ishtirok etib, modellik bilan shug‘ullangan.
2004-yilda u Prasad Bidapaning rahbarligi ostida o‘zini to‘liq modellik faoliyatiga bag‘ishlaydi. Uning iste’dodi va jozibadorligi tez orada e’tirof etiladi, u ko‘plab reklama roliklarida va bosma nashrlarda paydo bo‘ladi. Jumladan, 2006-yilgi Kingfisher taqvimini suratga olishda qatnashishi uning jamiyatdagi mashhurligini sezilarli darajada oshiradi. 21 yoshida Mumbayga ko‘chib o‘tgandan so‘ng, Padukone aktyorlik yo‘lidagi dastlabki ishini Himesh Reshammianing “Naam Hai Tera” klipida ishtirok etish bilan boshlaydi.
Shundan so‘ng rejissyor Farah Xon uning Reshammia klipidagi ishtirokini ko‘rib, uni o‘sha paytda “Yangi yil bilan” deb nomlangan filmga taklif qiladi. 2006-yilda Dipika “Ayshvariya” filmining bosh qahramoni sifatida kino olamida debyut qiladi.
Dastlabki muvaffaqiyatidan so‘ng omadsizlikka uchragan bo‘lsa-da, uning karyerasida “Kokteyl” (2012) romantik komediyasidan keyin sezilarli burilish yuz beradi va “Yeh Javani Hai Devani”, “Chennay Ekspress”, “Bajirao Mastani”, “Padmaavat” kabi turli filmlardagi rollari tufayli yanada o‘sadi. “Om Shanti Om” filmidagi ishtiroki esa aktrisaga olamshumul mashhurlik olib keladi.
2008-yilda “Ehtiyot bo‘ling, go‘zallar” filmini suratga olish paytida aktrisa Ranbir Kapur bilan sevishib qoladi. U hatto bo‘ynining orqa qismiga uning ism-sharifining bosh harflarini tatuirovka qildiradi. Ammo juftlik xiyonat sabab 2010-yilda munosabatlariga nuqta qo‘yadi.
Ranbir Kapur dastlab ayblovlarni rad etgan, ammo keyinchalik xiyonat qilganini tan olgan.
2011-yilda Dipika Siddhart Mallya bilan uchrasha boshlaydi. Keyingi yili ularning ajralishi haqida xabarlar paydo bo‘ladi, bunga javoban u shunday deydi: “Biz kelajagimizni birgalikda ko‘rolmaganimiz uchun do‘st bo‘lib qolishga qaror qildik”.
2012-yildan u Bollivud aktyori Ranvir Singx bilan munosabatda ekani haqida gap-so‘zlar tarqaladi. Dipika va Ranvir rejissyor Sanjay Lila Bhansalining “Ram va Lila” filmini suratga olish jarayonidan boshlab iliq munosabatlar o‘rnatgan bo‘lsa-da, ular uzoq vaqt davomida buni ommadan yashirishga harakat qildi. Ular birgalikda “Bajiaro va Mastani” hamda “Padmavati’’ kabi mashhur filmlarda ham suratga tushadi.
Va nihoyat 2015-yilda aktyor Dipikaga Maldiv orollarida turmush qurishni taklif qiladi, keyin esa ota-onasiga unashtirilganliklarini ma’lum qilish uchun uni darhol Bangalorga olib boradi.
Olti yil davom etgan munosabatlardan so‘ng 2018-yilda Bollivud juftligi go‘zal tabiat qo‘ynida — Italiyadagi Komo ko‘li yaqinida to‘y marosimini o‘tkazadi. Juftlik ikki xil an’anada bayram uyushtiradi: konkani milliy an’anasiga xos marosim d’Esteda villasida, sindhi an’analaridagi ikkinchi marosim esa Rokkabruna mehmonxonasida o‘tkaziladi.
2024-yilning mart oyida yulduzli juftlik ilk marta ota-ona bo‘lishlari haqida ijtimoiy tarmoqlarda ma’lum qilishdi. O‘sha yilning 8-sentyabrida esa Ranvir Singx va Dipika Padukone qizli bo‘ldi.
Nafaqat Bollivud, balki Gollivud filmlarida ham suratga tushgan aktrisa hind, ingliz va tulu tillarini yaxshi biladi. “Piku” filmida suratga tushish uchun bengal tilini o‘rganishiga ham to‘g‘ri kelgan.
Izoh (0)