Туркия ҳукумати АҚШ президенти Дональд Трампнинг 15 май пайшанба куни Украина инқирозини тинч йўл билан ҳал этиш бўйича музокараларда қатнашиш учун ташриф буюришини кутмаяпти. Бу ҳақда Bloomberg агентлиги маълум қилган.
Шу билан бирга, Туркия ҳукумати Америка раҳбарининг яқин кунларда, айниқса Россия президенти Владимир Путин Туркияга келса, Истанбулга ташриф буюришини ҳам истисно этмаяпти.
Илгари Трамп Туркияга сафар қилиш ғоясини ўйлаб кўришини айтган, аммо Яқин Шарққа сафари жадвали жуда зич эканлигини таъкидлаган эди.
Россия президенти Владимир Путин 15 май куни Истанбулда Украина билан тўғридан тўғри музокараларни бошлашни таклиф қилганди. Украина президенти Владимир Зеленский мазкур музокараларда Путинни шахсан кутишини айтди.
АҚШ президенти Дональд Трамп Россия ва Украина вакиллари ўртасида учрашувлар бўлиб ўтиши мумкин бўлган Истанбулга ташриф буюриш имкониятини кўриб чиқаётганини маълум қилди.
АҚШнинг Украинадаги махсус вакили Кит Келлог агар Россия президенти Владимир Путин 15 май куни Туркияга Россия ва Украина ўртасидаги учрашувга келса АҚШ президенти Дональд Трамп ҳам Истанбулга бориши мумкинлигини билдирди.
Россия президенти ёрдамчиси Юрий Ушаковнинг айтишича, Россия бош консуллиги ва Туркия ҳукумати эҳтимолий Россия—Украина музокаралари ўтказиладиган жойни ташкил этиш устида ишламоқда.
АҚШ президенти Дональд Трамп яқин кунларда Украинадаги можарони ҳал этиш масаласида яхши янгиликлар кутилаётганини маълум қилди.
Изоҳ (0)