Хитойнинг Қингхай провинциясида қурилиши кетаётган кўприкнинг асосий кабели узилиб, қулаб тушди. Бахтсиз ҳодиса оқибатида 12 нафар ишчи ҳалок бўлди, 4 нафари эса бедарак йўқолди. Бу ҳақда Xinhua хабар берди.
Фожиа 22 август куни, маҳаллий вақт билан соат 03:00 атрофида Қингхай провинциясининг Жаинка округида содир бўлган. Қурилиши кетаётган кўприкда 108 метр узунликдаги пўлат тўсиннинг асосий қовурғаси узилиб кетган. Бу пайтда қурилиш майдончасида жами 16 нафар ишчи бўлган.
Қутқарув ишлари зудлик билан бошланган: соат 14:00 га келиб, ҳодиса жойига 806 нафар қутқарувчи, 91 та техника, 27 та қайиқ, 1 вертолёт ва 5 та робот жалб этилган. Шунингдек, атрофдаги 6 та шифохонага жабрланганлар етказилган. Ушбу воқеадан хабар топгандан сўнг, Хитой фавқулодда вазиятлар бошқармаси махсус ишчи гуруҳни воқеа жойига юбориб, қутқарув операциясини бошқарган. Мутасаддилар дарҳол сувга чўккан ишчиларни аниқлаш ва уларни топиш учун барча ресурсларни сафарбар қилишни буюрган.
Шунингдек, ҳалокат сабаблари тез фурсатда аниқланиши ва келгусида шундай ҳодисаларнинг олди олиниши лозимлиги таъкидланган. Кўприк пўлат арк типида қурилаётган бўлиб, унинг асосий қисми август ойнинг охиригача битказилиши режалаштирилган эди.
Изоҳ (0)