Ўзбекистон Суперлигаси 20-тури доирасидаги навбатдаги икки баҳс 23 август, шанба куни бўлиб ўтди. Уларнинг бирида Термизнинг “Сурхон” клуби “Насаф”ни қабул қилиб, 1:2 ҳисобида имкониятни бой берган бўлса, иккинчи ўйинда Олмалиқнинг “ОКМК” клуби “Хоразм”дан 3:1 ҳисобида устун келди.
Термиздаги учрашувда ҳисоб иккинчи бўлимда очилди. 58-дақиқада Драган Чераннинг бош билан берган узатмасини Ҳусайн Норчаев голга айлантириб, “Насаф”ни олдинга олиб чиқди. Орадан атиги 3 дақиқа ўтиб, Норчаев ўзининг дублини нишонлади. У Чераннинг ажойиб пасидан сўнг бирга-бир вазиятга чиқиб, “Сурхон” дарвозасини иккинчи бор ишғол қилди.
Учрашув якунида “Сурхон” жавоб голини киритди. 90+1-дақиқада Рустам Турдимуродов “Насаф” дарвозасини ишғол қилиб, ҳисобни 1:2 кўринишига келтирди.
Мазкур ҳисоб ўйиннинг сўнгигача сақланиб қолди ва “Насаф” Термизда муҳим уч очкони қўлга киритди. Айни пайтда қаршиликлар 43 очко билан турнир жадвалида 1-ўринни эгаллаб турибди. 23 очкога эга “Сурхон” эса 9-поғонада бормоқда.
Ўзбекистон Суперлигаси
20-тур
23 август, шанба
“Сурхон” — “Насаф” 1:2
Голлар: 0:1 — Норчаев (58), 0:2 — Норчаев (61), 1:2 — Турдимуродов (90+1)
Куннинг иккинчи баҳси Олмалиқда бўлиб ўтди. Унда “ОКМК” “Хоразм”ни қабул қилиб, 3:1 ҳисобида ғалаба қозонди.
Учрашувдаги ҳисоб 8-дақиқада очилди. Азиз Холмуродов рақиб дарвозасини ишғол қилиб, Олмалиқ клубини олдинга олиб чиқди. 16-дақиқада Мурод Бобожонов “Хоразм” сафида жавоб голини уриб, умумий натижани 1:1 кўринишига келтириб қўйди.
72-дақиқада Георгий Папава “ОКМК”ни яна ҳисобда олдинга олиб чиқди. 89-дақиқада эса Наоаки Сенага жамоасининг учинчи голига муаллифлик қилди ва ҳисобни 3:1 кўринишига етказди.
Шу тариқа, “ОКМК” 20-турда навбатдаги муҳим ғалабасини қўлга киритди. Жамоа ҳозирда 37 очко билан Суперлига турнир жадвалида 4-ўринда бормоқда. 19 очкога эга “Хоразм” эса 12-поғонани эгаллаб турибди.
Ўзбекистон Суперлигаси
20-тур
23 август, шанба
“ОКМК” — “Хоразм” 3:1
Голлар: 1:0 — Холмуродов (8), 1:1 — Бобожонов (16), 2:1 — Папава (72), 3:1 — Сенага (89)
Изоҳ (0)