Украина президенти Владимир Зеленский урушни тугатиш учун Россия “нореал” шартлар қўяётганини айтди. Сиёсатчи бу ҳақда АҚШ вице-президенти Жей Ди Венс ва давлат котиби Марко Рубио билан Римда бўлган учрашувда маълум қилди.
Томонлар 18 май куни Туркияда бўлиб ўтган музокараларни муҳокама қилган. Зеленский Киев “ҳақиқий дипломатия”га тайёрлигини тасдиқлаган. У “имкон қадар тезроқ тўлиқ ва сўзсиз ўт очишни тўхтатишга” чақирган
Учрашувда Россияга қарши санкциялар зарурати, икки томонлама савдо, мудофаа ҳамкорлиги, жанг майдонидаги вазият ва келажакдаги асирлар алмашинуви масаласига ҳам тўхталиб ўтилди, деган Украина президенти.
У Москвага “урушни тўхтатишга тайёр бўлмагунча” босим ўтказишни давом эттириш зарурлигини айтган.
Албатта, биз адолатли ва барқарор тинчликка эришиш йўлида биргаликдаги ҳаракатларимизни муҳокама қилдик. Ҳаётларни сақлаб қолишдаги ёрдами ва етакчилиги учун бутун Америка халқига миннатдорлик билдираман, деди Зеленский.
Президент матбуот хизмати тушунтиришича, Зеленский АҚШ вакилларини Истанбулдаги музокаралар ва “Россия узоқ муддатли ўт очишни тўхтатиш учун қўйган нореал шартлар” ҳақида хабардор қилган.
Музокараларда қатнашган Россия делегациясининг даражаси пастлиги улар ҳеч қандай қарор қабул қилиш ваколатига эга эмаслигини кўрсатган, деган сиёсатчи.
Таъкидланишича, суҳбатдошлар Украина ва АҚШ ўртасидаги иқтисодий шериклик тўғрисидаги келишувни амалга оширишга эътибор қаратган. Зеленский АҚШ етакчиси Дональд Трампга “мудофаа-саноат ва савдо соҳаларида ҳамкорлик бўйича янги таклифлар билан мактуб” юборганини айтган.
Аввалроқ Россиянинг 16 май куни Истанбулда бўлиб ўтган музокараларда Украинага қўйган талаблари маълум бўлганди. Икки мамлакат делегацияларининг учрашуви икки соатга ҳам бормади. Туркия ташқи ишлар вазири Ҳоқон Фидан томонлар музокараларни давом эттириш учун янги учрашувга келишиб олганини айтган.
Ғарб нашри хабарига кўра, Россиянинг музокаралардаги бешта шарти қуйидагича:
- Бетараф Украина: мамлакат ҳудудида “Австрия нейтралитети модели” каби ҳеч қандай хорижий қўшинлар ёки оммавий қирғин қуроллари бўлмаслиги керак.
- Репарацияларсиз: иккала томон ҳам уруш туфайли етказилган зарарни қоплаш бўйича ҳар қандай даъволардан воз кечиши керак.
- Русийзабонлар ҳуқуқлари: Украина озчиликлар ҳуқуқлари бўйича Европа стандартларини қабул қилиши ва “миллатчилик ташвиқоти”га чек қўйиши керак.
- Ҳудудларни тан олиш: Россия Украинанинг бешта вилояти (Донецк, Луганск, Херсон, Запорожье ва Қрим) га нисбатан “конституциявий” даъволари рад этмаслигини истайди. Шунингдек, Кремль босиб олинган ҳудудларга бўлган ҳуқуқларини халқаро миқёсда тан олишга интилмоқда.
- Ўт очишни дарҳол тўхтатиш шарти: Украина мудофаа кучлари Украинанинг Россия даъво қилаётган барча 5 та ҳудудидан чиқиб кетиши керак.
Изоҳ (0)