Беларусда мамлакат эҳтиёжларини қондириш ва ортиқчасини Россияга сотиш учун етарли миқдорда картошка етиштириш зарур. Бу ҳақда Беларусь президенти Александр Лукашенко маълум қилди.
Кўп гап-сўзлар бўляпти. Айниқса, Россия президенти ҳузуридаги йиғилишдан сўнг, у картошка ҳақида ҳазиллашди. Аммо биз учун бу жуда жиддий масала... Нима бўлганда ҳам, картошка етиштиришни яхши биламиз, деди Лукашенко.
У беларусларга ҳам, Россияга ҳам етадиган даражада картошка етиштириш вазифасини қўйди. Президентнинг айтишича, Беларусь “рус биродарлар”га ёрдам кўрсатиши лозим.
Бунинг устига, бу хайрия эмас. Бу яхшигина даромад ва нархлар дегани, дея таъкидлаган у.
Лукашенконинг баёноти Россия ва Беларусда картошка танқислиги ҳамда қимматлашиши кучайган бир пайтда янгради. Бундан олдин президент Владимир Путин Россия дўконларида сабзавот етишмаслиги муаммосини тан олган эди. Россия президентига кўра, бизнес вакиллари билан учрашувдан сўнг у “картошка етишмаётганини” аниқлаган.
Александр Лукашенко билан гаплашдим. У “Биз аллақачон ҳамма нарсани Россияга сотиб юбордик”, деди, деган эди Путин.
Картошка тақчиллиги
Россияда чакана картошка нархи май ойи охирига келиб ўтган йилга нисбатан 173 фоизга ошди. Бу расмий статистикада сўнгги 23 йил ичида қайд этилган рекорд ҳисобланади. Беларусь яқинда Евроиттифоқдан картошка ва бошқа бир қатор маҳсулотларни олиб киришга қўйилган тақиқни бекор қилди. Евроиттифоқ давлатлари Беларусь томонидан “дўст бўлмаган мамлакатлар” ҳисобланади.
Бунга қадар Лукашенко мамлакатда картошка танқислиги кучайганини тан олган ва бунда маҳаллий фермерларни айблаганди. Унинг айтишича, фермерлар барча картошкани нархи қимматроқ бўлган Россияга сотиб юборган. Февраль ойида Лукашенко ҳукуматга картошка нархининг ошиши билан боғлиқ муаммони ҳал қилишни топширган. Ундан олдинроқ эса озиқ-овқат захираларини шакллантиришни талаб қилган, бироқ ҳукумат бу топшириқларни бажара олмаган.
Изоҳ (0)