Украина президенти Владимир Зеленский 15 май куни Истанбулда бўлиб ўтадиган тинчлик музокараларида фақат Россия президенти Владимир Путин билан учрашади. Россиянинг бошқа ҳеч бир вакили билан музокаралар бўлмайди. Бу ҳақда Украина президенти офиси раҳбари маслаҳатчиси Михаил Подоляк маълум қилди.
Подолякдан агар Россия президенти музокараларга келмаса, Зеленский қандай йўл тутиши ҳақида сўралди. Бунга жавобан сиёсатчи Украина қуйи даражадаги музокараларни фойдасиз деб ҳисоблашини айтди.
Биз Россиядаги ҳокимият тузилишини тушунамиз. Мединский у ёқда турсин, ҳатто Лавров ҳам Путиннинг ғояси бўлган у ёки бу қарорларни қабул қилиш ваколатига эга эмас. Яъни урушни давом эттириш ёки тўхтатиш ҳақида фақат Путин қарор қабул қилиши мумкин, деди Подоляк.
У Истанбулдаги музокаралар жараёнининг тузилиши аниқ эканини маълум қилди.
Украина ва Россия томонидан қарор қабул қиладиган одам бор. Бошқа ҳамма нарса — натижасиз расмий иштирок. Учрашувни қуйи даражада ўтказишдан маъно нима?, деди Зеленский офиси раҳбари маслаҳатчиси.
Украина ва Россия ўртасидаги музокаралар
2022 йилда Россия ва Украина ўртасидаги можаро бошланганидан бери томонлар уни ҳал қилишга бир неча бор уриниб кўрди. Музокараларнинг дастлабки уч раунди Беларусда — 28 февраль куни Гомелда, 3 ва 7 март кунлари Брестда бўлиб ўтди, бироқ асосий масалалар бўйича келишиб бўлмади.
2022 йил 10 март куни Анталиядаги Дипфорум доирасида Россия ва Украина Ташқи ишлар вазирлари ўртасида учрашув бўлиб ўтди, бироқ у олдинга силжиш олиб келмади.
29 март куни Истанбулдаги Долмабахче саройида бўлиб ўтган учрашув янада аҳамиятли бўлди. Унда Украина делегацияси Россия томонига эҳтимолий келишув лойиҳаси ва кафолат берувчи давлатлар рўйхатини тақдим этди. Бироқ 17 май куни Украина музокараларни расман тўхтатди. 4 октябрь куни Украина президенти Владимир Зеленский Россия президенти Владимир Путин билан мулоқот қила олмаслик тўғрисидаги МХХ қарорини имзолади.
Дипломатик боши берк кўчага кириб қолганига қарамай, 2022 йил 22 июль куни Истанбулда БМТ ва Туркия воситачилигида Қора денгиз дон ташаббуси бўйича келишувга эришилди.
18 март куни АҚШ президенти Дональд Трамп ва Россия президенти Путин ўртасидаги телефон суҳбатидан сўнг Россия томони энергетика инфратузилмасига зарбалардан ўзаро воз кечиш ғоясини қўллаб-қувватлади, эртаси куни президент Зеленский худди шундай чораларга розилик берди.
2025 йил 11 майга ўтар кечаси президент Путин баёнот бериб, Истанбулда Украина билан олдиндан ҳеч қандай шарт қўймасдан тўғридан-тўғри музокаралар ўтказишни таклиф қилди. Туркия президенти Ражаб Тоййиб Эрдўғон учрашувни ташкил этишга тайёрлигини билдирди.
Трамп россиялик ҳамкасбининг Украина билан тўғридан-тўғри музокараларни қайта бошлаш таклифини қўллаб-қувватлади. Зеленский эса 15 май куни Истанбулда бўлиб ўтадиган музокараларда иштирок этишини тасдиқлади.
Изоҳ (0)