Украина президенти Владимир Зеленский Россия билан асирларни алмашиш бўйича “1000 га 1000” форматида йиғилиш ўтказди. Бу ҳақда президентнинг ўзи ижтимоий тармоқларда маълум қилган.
“Айирбошлашга тайёргарлик кўриш бўйича йиғилиш ўтказдим. Россия асирлигидан 1000 нафар фуқаромизни озод қилиш тўғрисидаги келишув Туркиядаги учрашувнинг деярли ягона амалий натижаси бўлди. Бу натижани таъминлаш учун ҳаракат қилмоқдамиз”, деди у.
Зеленскийнинг айтишича, йиғилиш давомида Россия томони билан алоқалар бўйича маърузалар тингланган. У алмашинув жараёнини Украина Мудофаа вазирлиги раҳбари Рустем Умеров назорат қилаётганини қўшимча қилган. Бундан ташқари, жараёнга Хавфсизлик хизмати, Ташқи разведка хизмати, Ички ишлар вазирлиги, Олий Раданинг инсон ҳуқуқлари бўйича вакили ва Президент девони жамоаси жалб этилган.
Бундан олдин Россия президенти матбуот котиби Дмитрий Песков барча томонлар ўртасида маҳбуслар алмашинуви имкон қадар тезроқ амалга оширилишидан манфаатдор эканлигини маълум қилди. Шунингдек, Россия томони Киевга “мингга минг” формуласи асосида алмаштиришга таклиф этилган шахслар рўйхатини топширганини тасдиқлаб, Украина томонидан ҳам шу каби рўйхат кутилаётганини билдирди.
“Биз ҳақиқатан ҳам ўз рўйхатимизни топширдик. Киевдан ҳозирча жавоб рўйхати келмади. Кутмоқдамиз”, дея таъкидлади у.
Ушбу форматда асирларни алмашиш бўйича келишувга Россия Федерацияси ва Украинанинг сўнгги уч йил ичидаги биринчи музокараларида эришилган.
Истанбул музокаралари
10 май куни Украина президенти Владимир Зеленский Киевда Европанинг тўрт давлати раҳбарларини қабул қилди. Саммит якунида улар қўшма баёнот қабул қилиб, унда Россиядан камида 30 кун давомида сўзсиз ўт очишни тўхтатишни талаб қилди ва янги санкциялар билан таҳдид солди.
Орадан бир неча соат ўтиб, 11 майга ўтар кечаси Россия президенти Владимир Путин Кремлда журналистларни тўплаб, Истанбулда 2022 йил баҳорида тўхтаб қолган музокаралар 15 майдан бир томонлама тартибда қайта тикланишини эълон қилди.
Шундан сўнг Зеленский Туркияга келишини, лекин фақат Путин билан музокара олиб боришини айтди. Кремль 14 майга ўтар кечаси Россия делегацияси таркибини эълон қилди. Унга Мединский бошчилик қилди.
Россия делегацияси 15 май куни эрталаб Истанбулга учиб келди. Шу куни тушдан кейин Владимир Зеленский Украина расмийлари билан бирга Туркия раҳбари Ражаб Тоййиб Эрдўғон билан музокаралар ўтказиш учун Анқарага учиб келди. Уч соатга яқин давом этган учрашувдан сўнг Зеленский Умеров бошчилигидаги Украина делегациясини музокараларда иштирок этиш учун Истанбулга юборишга розилигини билдирди.
Истанбулда 16 май куни Россия ва Украина делегациялари ўртасида 2022 йил баҳоридан бери биринчи музокаралар ўтказилди. Томонлар ўт очишни тўхтатиш бўйича келишувга эриша олмади, аммо энг йирик асирлар алмашинувини амалга оширишга келишиб олди.
Изоҳ (0)