Россия ва Украина Истанбулда эришилган келишувларга кўра, ўт очишни тўхтатиш бўйича ўз таклифларининг тафсилотларини ёпиқ тартибда муҳокама қилади. Бу ҳақда Россия ТИВнинг Киев режими жиноятлари бўйича махсус ваколатли элчиси Родион Мирошник маълум қилди.
“Қисқа бўлса-да, биринчи учрашув якунида ўт очишни тўхтатиш режимини жорий этиш шартлари, аниқроғи, томонларнинг таклифлари алоқа гуруҳи доирасида кўриб чиқилиши тўғрисида келишувга эришилди. Шу боис ҳозирда ҳар икки томон ўз таклифларини тайёрламоқда ва улар ҳам худди шундай ёпиқ музокаралар тартибида муҳокама қилинади”, деди дипломат “Россия 24” телеканали эфирида.
Мирошникнинг аниқлик киритишича, гап ўт очишни тўхтатиш янги кескинлашувга эмас, балки тинчликка олиб борадиган йўл бўлишини кафолатлайдиган “нозик жиҳатлар” ва “механизмлар” ҳақида бормоқда.
Россия cа Украина ўртасидаги музокаралар
10 май куни Украина президенти Владимир Зеленский Киевда Европанинг тўрт давлати раҳбарларини қабул қилди. Саммит якунида улар қўшма баёнот қабул қилиб, унда Россиядан камида 30 кун давомида сўзсиз ўт очишни тўхтатишни талаб қилди ва янги санкциялар билан таҳдид солди.
Орадан бир неча соат ўтиб, 11 майга ўтар кечаси Россия президенти Владимир Путин Кремлда журналистларни тўплаб, Истанбулда 2022 йил баҳорида тўхтаб қолган музокаралар 15 майдан бир томонлама тартибда қайта тикланишини эълон қилди.
Шундан сўнг Зеленский Туркияга келишини, лекин фақат Путин билан музокара олиб боришини айтди. Кремль 14 майга ўтар кечаси Россия делегацияси таркибини эълон қилди. Унга Мединский бошчилик қилди.
Россия делегацияси 15 май куни эрталаб Истанбулга учиб келди. Шу куни тушдан кейин Владимир Зеленский Украина расмийлари билан бирга Туркия раҳбари Ражаб Тоййиб Эрдўғон билан музокаралар ўтказиш учун Анқарага учиб келди. Уч соатга яқин давом этган учрашувдан сўнг Зеленский Умеров бошчилигидаги Украина делегациясини музокараларда иштирок этиш учун Истанбулга юборишга розилигини билдирди.
Истанбулда 16 май куни Россия ва Украина делегациялари ўртасида 2022 йил баҳоридан бери биринчи музокаралар ўтказилди. Томонлар ўт очишни тўхтатиш бўйича келишувга эриша олмади, аммо энг йирик асирлар алмашинувини амалга оширишга келишиб олди.
Изоҳ (0)