Украина Ташқи разведка хизмати раҳбари Олег Ивашченконинг айтишича, Хитой Россияга ҳарбий мақсадларда ишлатиладиган компонентларни тизимли равишда етказиб бермоқда. “Укринформ” агентлиги хабарига кўра, гап порох, махсус кимёвий моддалар, техник ускуналар ва дастгоҳлар ҳақида боряпти. Даъво қилинишича, Россиянинг камида 20 та ҳарбий саноат корхонаси бу ҳамкорликдан фойда кўряпти.
“Ишончли маълумотларга кўра, Хитой махсус кимёвий моддалар, технологик ускуналар, порох ва бошқа компонентларни тўғридан-тўғри етказиб бермоқда. Россиянинг 20 та корхонаси бу жараёнда иштирок этаётгани тасдиқланган,” деди Ивашченко.
Украина мулозимига кўра, 2024–2025 йилларда Хитой ва Россия ўртасида авиацияга оид камида бешта ҳамкорлик ҳолати қайд этилган. Хусусан, рус корхоналарига ускуна, эҳтиёт қисмлар ва техник ҳужжатлар юборилган. Бундан ташқари, махсус кимёвий моддалар билан боғлиқ олтита кейс ҳам қайд этилган.
Олег Ивашченконинг маълум қилишича, жорий йил ҳолатига Россия дронларида қўлланилаётган муҳим электрон компонентларнинг 80 фоизгача қисми Хитойдан келтирилмоқда. Айрим ҳолатларда бундай маҳсулотлар учинчи давлатлар орқали етказиб бериляпти. Жараёнда ёлғон номлар, сохта ҳужжатлар ва қобиқ компаниялар ишга солиниб, асл манба яширилмоқда.
Хитойнинг Россияга ёрдами
Донецк учун апрель ойидаги жанглар пайти украиналиклар Россия томонида жанг қилаётган икки нафар Хитой фуқаросини қўлга олди. Орадан кўп ўтмай воқеага Украина президенти ҳам аралашиб, рус армияси сафида жанг қилаётган хитойликлар сони анча кўплигини маълум қилди.
“Хитойликлар масаласи” жиддий. Ҳозирда бизда 155 нафар киши ҳақида маълумот бор — уларнинг фамилиялари, паспорт маълумотлари мавжуд. Бу 155 киши Хитой фуқаролари бўлиб, Украина ҳудудида украиналикларга қарши жанг қилмоқда... Биз бу борада маълумот тўплаяпмиз ва уларнинг сони бундан ҳам кўпроқ, деб ҳисоблаймиз. Шу 155 киши ҳақида барча тафсилотлар бор: қаерданлиги, хитой ҳужжатлари, ёши ва ҳоказо. Уларнинг хизмат қилаётган жойлари ҳам аниқ: 70, 71, 255-моторлашган милтиқ полклари ва шунга ўхшаш бўлинмалар, деган эди Зеленский.
Кейинроқ асир олинган икки нафар хитойлик жамоатчилик вакиллари билан юзлаштирилди. Улар Россия армияси сафига кўнгилли сифатида қўшилгани, бунда Пекиннинг алоқаси йўқлигини таъкидлади.
Изоҳ (0)