Туркиянинг Кремль раҳбари билан музокаралари натижа бермаган бўлса-да, Вашингтон Анқаранинг ғалла ташаббусини қайта тиклашга қаратилган саъй-ҳаракатларини олқишлайди. Бу ҳақда АҚШ Давлат департаментида Туркия президенти Ражаб Тоййиб Эрдўғон ва Россия президенти Владимир Путиннинг дон келишуви бўйича 4 сентябрдаги учрашувидан сўнг маълум қилинди.
“Биз Туркия ва бошқа давлатларнинг Россияни келишувга қайтаришга бўлган саъй-ҳаракатларини олқишлаймиз. Қора денгиз ғалла ташаббусини амалга ошириш учун кўп куч сарфлаган Бирлашган Миллатлар Ташкилоти ва Туркия билан ҳамкорликда ишламоқдамиз”, — дейди Давлат департаменти вакили.
АҚШ Давлат департаменти Туркияга янги келишувга эришишга қаратилган “муҳим дипломатик ва оператив саъй-ҳаракатлари” учун миннатдорлик билдирди.
Шунингдек, идора Россиянинг ғалла ташаббусидан воз кечиш қарори “бутун дунё бўйлаб озиқ-овқат хавфсизлиги заиф бўлган жамиятлар учун зарарли” эканини қўшимча қилди.
Эслатиб ўтамиз, Эрдўғон ва Путин 4 сентябрь куни Сочида музокара олиб борди. Унда томонлар дон келишувини янгилаш бўйича келишувга эриша олмади. Украинадаги вазият борасида Россия президенти Украина қўшинларининг қарши ҳужуми “Киев учун мутлақо муваффақиятсиз” бўлиб чиққанини айтди.
Учрашувда, шунингдек, Россия ва Туркия муносабатлари ҳам муҳокама қилинди.
Изоҳ (0)