Украина президенти Владимир Зеленский россиялик ҳамкасби Владимир Путин иштирок этмаслиги сабабли Истанбулдаги музокараларда қатнашишдан маъно кўрмаётганини билдирди. Бу ҳақда Зеленский Анқарада Туркия президенти билан музокаралар якунлари бўйича ўтказилган матбуот анжуманида маълум қилди.
“Менинг боришимдан фойда йўқ. Путин келмади, келадими - билмаймиз. Президент Трамп ҳам маълум бир хабар юборди, балки келар. Ҳар ҳолда, ҳозирча аниқ қарор йўқ”, деди у.
Украина президенти Россия томони Истанбулда режалаштирилган музокараларга “жиддий ёндашмаганини” айтган.
Унинг сўзларига кўра, Россия делегацияси таркибида бирор қарор қабул қилишга ваколатли расмий шахслар йўқ.
Украина раҳбари таъкидлашича, айнан Россия тўғридан-тўғри музокаралар ташаббуси билан чиққан ва буни, жумладан, АҚШ президенти Дональд Трамп ҳам қўллаб-қувватлаган.
“Россия томонининг иштироки паст даражада бўлишига қарамай, Украина президентлар Трамп ва Эрдўғонга ҳурмат юзасидан тинчликка содиқ қолишда давом этади”, деди у.
Шунингдек, Зеленский учрашув тўрт томонлама форматда, Украина, Россия, Туркия ва АҚШ делегациялари иштирокида ўтказилиши кераклигини билдирган.
Истанбулда Россия билан музокараларда Украина делегациясига мудофаа вазири Рустем Умеров бошчилик қилади.
“Мен ҳозир Истанбулга делегациямизни юборишга қарор қилдим, лекин ҳаммасини эмас... Делегацияга мудофаа вазири раҳбарлик қилади”, деди Зеленский.
Унинг айтишича, Украина делегацияси музокараларда ўт очишни тўхтатиш масаласини муҳокама қилмоқчи.
Шунингдек, Украина Президенти Туркия президенти Ражаб Тоййиб Эрдўғонга музокараларни ташкил этгани ва улар учун жой тақдим этгани учун миннатдорчилик билдирган.
“Бундан ташқари, президент Эрдўғон Қрим Украинанинг бир қисми эканлиги ҳақидаги ўз позициясини ҳам тасдиқлади”, деди у.
Киев АҚШ ва Туркиядан Украина ва Россия ўртасида Истанбулда музокаралар ўтказиш муддатлари бўйича аниқ маълумотларни кутмоқда.
“Биз АҚШ ва Туркиядаги ҳамкасбларимиздан музокаралар вақти ва санаси бўйича аниқ хабарларни кутмоқдамиз. Улар бугун ёки эртага ўтказилиши мумкин”, деди Украина президенти.
Зеленскийнинг таъкидлашича, Украина Россия билан музокаралардан манфаатдор ва учрашув “барибир бўлиб ўтишига” умид қилмоқда.
“Тинчликка олиб келиши мумкин бўлган энг кичик қадамни ҳам ҳеч ким эътиборсиз қолдирмайди. Бизнинг позициямиз конструктив бўлиб қолади”, дея қўшимча қилди у.
Россия президенти Владимир Путин 15 май куни Истанбулда Украина билан тўғридан тўғри музокараларни бошлашни таклиф қилганди. Украина президенти Владимир Зеленский мазкур музокараларда Путинни шахсан кутишини айтди.
Изоҳ (1)
путин зеленскийни рахбар сифатида курмиди менимча чунки бу зеленский сиёсатни тушунмиди россия босиб оляпти деб жар солорадию́ америкага индаме борини куш куллаб бериб куйоради