«Дарё» нашри 16 сентябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
ШҲТ саммити доирасида билдирилган давлат раҳбарларининг фикрлари билан танишамиз.Покистон етакчиси ўз нутқида мамлакатдаги талафотларни эслатиб ўтди ва Покистон тошқин сабаб катта денгизга ўхшаб қолганини таъкидлади.
Россия президенти Владимир Путин эса терроризм ва экстремизм, гиёҳванд моддалар савдоси ва ноқонуний қуролли гуруҳларга қарши кураш устувор вазифалардан бири бўлганини ва бундан кейин ҳам шундай бўлиб қолишини билдириб ўтди.
Шунингдек, ШҲТ Минтақавий аксилтеррор тузилмаси Ижроия қўмитаси директори Руслан Мирзаевнинг сўзларига кўра, яхши мувофиқлаштирилган ишлар натижасида 2021 йилда ШҲТга аъзо давлатларда бирорта теракт содир бўлмади.
Қозоғистон Президенти Қосим Жўмарт Тўқаев "Бизнинг ғояларимизда қарама-қаршилик ва блок йўқ, шу боис ташкилот географияси табиий равишда йилдан йилга ўсиб бормоқда», - дея таъкидлаган.
«АҚШ безориларча ўз қонунларини халқаро ҳамжамиятга буюрмоқда. Улар бошқа давлатларга босим ўтказиш учун турли воситалардан фойдаланади. Шанхай ҳамкорлик ташкилоти бу бирёқлама ёндашувга қарши курашиши керак. Банк соҳасида савдо шериклик ва инфратузилмани мустаҳкамлаш муҳим аҳамиятга эга. Биз ҳамкорлик орқали адолатли дунё яратиш марказида бўлишни мақсад қилганмиз», — дейди Эрон президенти Иброҳим Раисий.
Ўз ўрнида Туркия президенти Ражаб Тоййиб Эрдўған ҳам "Бизнинг мулоқот бўйича ҳамкор мақомимиз туфайли сўнгги 10 йил ичида ШҲТ Осиёга очилган деразаларимиздан бирига айланди. ШҲТ Осиё минтақасидаги ишончли платформадир. Унинг фаолияти боис биз бағрикенглик, ўзаро ёрдам ва ҳамкорлик ғояларини тарғиб этяпмиз" - дея фикр билдирди.
Ўзбекистон давлат раҳбари Шавкат Мирзиёев ўзаро ишонч, адолат ва ҳамжиҳатликка талаб глобал миқёсда тобора ортиб бораётганини таъкидлаган ҳолда, Афғонистонни гуманитар қўллаб-қувватлаш бўйича махсус фонд таъсис этишни таклиф қилди.
Путин ва Си Цзиньпин Самарқандда учрашди
15 сентябрь куни Россия президенти Владимир Путин ва Хитой Халқ Республикаси (ХХР) раиси Си Цзиньпин Самарқандда Шанхай ҳамкорлик ташкилоти (ШҲТ) саммити доирасида учрашди, деб ёзади Meduza.
Учрашув бошида Путин Хитой вакилларига «Украина инқирози» бўйича масалаларни очиқлашга ваъда берди.
«Айтиш керакки, бир қутбли дунёни юзага келтиришга уринишлар сўнгги вақтларда мутлақо хунук қиёфа касб этди ва сайёрадаги давлатларнинг аксарияти учун номақбул бўлиб қолди. Хитойлик дўстларимизнинг Украина инқирози юзасидан мувозанатлашган позициясини юқори баҳолаймиз, сизнинг бу борадаги саволларингиз ва хавотирингизни тушунамиз, ва бугунги учрашув давомида, албатта, ушбу масала бўйича позициямизни очиқлаб ўтаман, гарчи биз бу ҳақда аввал ҳам гаплашган бўлсак-да», — деди Путин
ШҲТ Самарқанд саммити Ўзбекистоннинг катта дипломатик ғалабасидир — Le Figaro
Франциянинг Le Figaro нашри Шанхай Ҳамкорлик Ташкилотининг Самарқанд саммити ҳақида ёзар экан, унинг иккита муҳим жиҳатига эътибор қаратди. Биринчидан, бу Хитой раҳбари Си Цзиньпиннинг пандемия бошлангандан бери илк хорижий сафари бўлиб, у, жумладан, Россия президенти Владимир Путин билан учрашади. Иккинчидан, ШҲТ кўлами бўйича БМТдан кейин турадиган йирик минтақавий тузилмадир. Бу ташкилот заминида дунё аҳолисининг 42 фоизи истиқомат қилади.
ШҲТ Европа Иттифоқи сингари сиёсий ташкилот ҳам, НАТО каби ҳарбий блок ҳам эмас, деб ёзади нашр. ШҲТда Ўзбекистон алоҳида ўринга эга. Ташкилотга яқинга қадар Ўзбекистон вакили, ҳозирда мамлакат ташқи ишлар вазири Владимир Норов раҳбарлик қилди, саммитнинг Самарқандда ўтказилиши ҳам бежизга эмас. Бу Ўзбекистоннинг катта дипломатик ғалабасидир, дейилади нашр мақоласида.
Le Figaro экспертларининг таъкидлашича, Ўзбекистон чиндан ҳам халқаро муносабатларнинг катта «шахмат доскаси»да муҳим ўрин тутади. Мамлакат Путиннинг Украинадаги урушини қўллаб-қувватламайди, бундан ташқари, у эҳтиёткорона ташқи сиёсати туфайли Россия билан ҳам, Хитой билан ҳам бир хил муносабатларни сақлаб қолмоқда. Ўзбек дипломатияси фаол ва кўпқирралидир.
Қирғизистон ва Тожикистон президентлари чегарадаги вазият юзасидан юзма-юз музокара ўтказди
Икки давлат раҳбарлари тегишли тузилмаларга ўт очишни тўхтатиш, қўшин ва воситаларни тўқнашув чизиғидан олиб чиқиш бўйича кўрсатмалар беришга келишиб олди.
Изоҳ (0)