15 май куни Анқарада Туркия президенти Ражаб Тоййиб Эрдоғон ва Украина президенти Владимир Зеленский ўртасидаги учрашув ўтказилди. Матбуот учун ёпиқ бўлган икки томонлама учрашув ва президент қароргоҳида делегациялар иштирокидаги ишчи тушлик 2 соат 45 дақиқа давом этган. Бу ҳақда Anadolu ахборот агентлиги хабар бермоқда.
Учрашувда Анқара тезроқ тинчлик ўрнатиш мақсадида Украина ва Россия ўртасидаги мулоқот каналларини очиқ сақлашга катта эътибор қаратаётганлиги та`кидланган.
Туркия президенти маъмурияти ҳузуридаги Алоқалар бошқармаси хабарининг хабар беришича, давлат раҳбари Туркиянинг “икки давлат раҳбарлари тайёр бўлганида уларни қабул қилишга” тайёрлигини билдирган.
Маълум қилинишича, учрашувда Россия-Украина можаросини тўхтатишга урғу берилган ҳолда икки томонлама ва минтақавий масалалар муҳокама этилган.
Туркия раҳбари Россия Федерацияси ва Украина ўртасидаги урушни тўғридан-тўғри музокаралар йўли билан ҳал этиш зарурлигини таъкидлаган. У янада кўпроқ инсонлар қурбон бўлишининг олдини олиш учун минимал умумий тамойиллар бўйича келишувга эришиш ғоят муҳимлигини уқтирган.
Президент Эрдоғон Россия Федерацияси ва Украина ўртасидаги музокараларни бошлашнинг тарихий имконияти мавжудлигини таъкидлаб, ҳам техник, ҳам раҳбарлар даражасидаги музокараларни қатъий қўллаб-қувватлашини билдирган.
Россия президенти Владимир Путин 15 май куни Истанбулда Украина билан тўғридан тўғри музокараларни бошлашни таклиф қилганди. Украина президенти Владимир Зеленский мазкур музокараларда Путинни шахсан кутишини айтди.
14 май куни Путин музокараларда қатнашадиган Россия делегация таркибини тасдиқлаган. Делегация раҳбари этиб Россия президенти ёрдамчиси Владимир Мединский тайинланган. У 2022 йилда Украина ва Россия делегациялари учрашганида Россия томонидан музокаралар гуруҳи раиси бўлганди.
Изоҳ (0)