Украина урушида қатнашган Ўзбекистон фуқаросига 4 йиллик жазо тайинланди. Бу ҳақда Олий суд “Дарё”га хабар берди.
Унга кўра, 2024 йил 23 февраль куни И.З. мавсумий ишлаш мақсадида Тошкент—Санкт Петербург йўналишидаги авиарейс орқали Россиянинг Санкт Петербург шаҳрига етиб борган. 2024 йил 12 июнь куни у Россия Мудофаа вазирлиги билан бир йиллик муддатга ҳар ойда 195 000 рубль миқдорида ойлик маош олиш эвазига муддатли ҳарбий хизматни ўташ тўғрисида шартнома имзолаган ва Россия-Украина урушида Россия томонида жанговар ҳаракатларда иштирок этишга розилик билдирган.
2024 йил 24 июнь куни у Луганск вилоятидаги 31985-сонли ҳарбий қисм полигонига бориб, 14 кун давомида ҳарбий тайёргарликдан ўтган ва икки ҳафта ушбу ҳарбий қисмда бўлган. Шу даврда ҳарбий дрон портлаши натижасида у ўнг оёғидан яраланган. 2024 йил 4 август куни Белгород шаҳридаги ҳарбий госпиталга ётқизилиб, 13 кун даволанган ва 17 август куни яна Луганск вилоятидаги ҳарбий қисмга қайтган.
Шундан сўнг у қўшимча даволаниш учун 15 кунлик таътил сўраб ҳарбий қисм командирига мурожаат қилган, бироқ рад жавобини олгач, 2024 йил 5 сентябрь куни ҳарбий қисмларни рухсатсиз тарк этган. 2024 йил 1 октябрь куни Москва—Самарқанд йўналишидаги авиарейс орқали Ўзбекистонга қайтиб келган.
2025 йил 13 февраль куни Давлат хавфсизлик хизмати Қашқадарё вилояти бўйича бошқармасига ўзининг Россия ва Украина ўртасидаги жанговар ҳаракатларда иштирок этгани юзасидан ихтиёрий равишда пушаймонлик аризаси билан мурожаат қилиб, тегишли ҳужжатларни тақдим қилган.
Суд И.З.нинг ҳаракатларини Жиноят кодексининг 154-моддаси (ёлланиш) 1-қисмида назарда тутилган жиноят деб топиб, унга 4 йил муддатга озодликни чеклаш жазоси тайинлади.
Фарғона вилоятида фуқароларни Россия-Украина урушига жўнатишга уринган такси ҳайдовчиси ушлангани хабар қилинганди.
Изоҳ (0)