Корея Халқ Демократик Республикаси Хитой томонга 10 дан ортиқ баллистик ракета учирди. Бу ҳақда Reuters хабар бермоқда.
Агентлик маълумотларига кўра, ракеталар 19 июнь куни Пхеньян яқинидаги Сунан шаҳридан шимоли-ғарбий йўналишда учирилган.
Ҳозирча бошқа тафсилотлар келтирилмаяпти. Агентликнинг таъкидлашича, қўлланилган қурол-яроғлар одатда Жанубий Корея ҳарбий кучлари томонидан қисқа масофали баллистик ракеталар сифатида таснифланади.
Бундан олдин КХДР раҳбари Ким Чен Ин Шимолий Корея ҳарбийларини урушга тайёр туришга чақирган эди.
Давлат раҳбари Корея Халқ армиясининг биринчи гвардиячи ҳарбий-ҳаво дивизиясига қарашли авиация полкига ташриф буюрди. У ерда Шимолий Корея ҳарбий-ҳаво кучлари авиация бўлинмаларининг жанговар машқларига раҳбарлик қилган.
Машқлар давомида Шимолий Корея ҳарбийлари ҳаво ҳужумидан мудофаа вазифаларини бажариш бўйича авиация бўлинмалари, зенит-ракета қисмлари, радар ва радиоэлектрон кураш бўлинмаларининг кўникмаларини синовдан ўтказган. Шунингдек, улар қанотли ракеталар ва ҳужумкор камикадзе-дронларни йўқ қилишни машқ қилган.
Та`кидланишича, БМТ Хавфсизлик кенгаши қарорлари Шимолий Кореяга баллистик ракеталардан фойдаланишни тақиқлаган.
Бу сўнгги пайтларда содир бўлган ягона ҳолат эмас. Май ойи бошида Шимолий Корея Япон денгизи томон номаълум баллистик ракета учиргани ҳақида Yonhap агентлиги хабар берган эди. Кейинроқ агентлик бир нечта қисқа масофали баллистик ракеталар учирилган бўлиши мумкинлигини аниқлаштирди.
Бундан ташқари, 10 март куни Пхеньян Сариқ денгиз томонга бир нечта баллистик ракета учирди. Айни куни АҚШ ва Жанубий Кореянинг қўшма ҳарбий машқлари бошланди, бу эса КХДРнинг кескин танқидига сабаб бўлди.
21 март куни Шимолий Корея зенит-ракета тизимини, февраль ойи охирида эса стратегик қанотли ракеталарни синовдан ўтказди. Ўшанда КХДР раҳбари Ким Чен Ин бундай синовлардан мақсад эҳтимолий рақибларни огоҳлантириш ва “турли ядровий воситаларнинг қўллашга тайёрлигини” намойиш этиш эканини таъкидлаган эди.
Изоҳ (0)