Исроил мудофаа армияси 24 август куни Яман пойтахти Сана шаҳрига ҳужум қилди. Яҳудий давлати ҳусийларнинг ҳарбий объектларига зарба берганини даъво қилмоқда.

Исроил қирувчи самолётлари ҳужум қилган объектлар орасида президент саройи жойлашган ҳарбий мажмуа, иккита электр станцияси, ёқилғи омбори ҳам бор.
Санадаги президент саройи ҳарбий объект ҳудудида жойлашган бўлиб, у ерда ҳусийларнинг ҳарбий кучлари фаолият олиб бормоқда, дея маълум қилди яҳудий армияси.
Шаҳарга қилинган авиаҳужум оқибатида икки киши ҳалок бўлган, камида 35 киши яраланган.
Электр станцияларига берилган зарба уларнинг ҳарбий мақсадларда электр ишлаб чиқариш ва таъминлаш фаолиятига зарар етказади. Ҳусийлар Эрон режимининг кўрсатмалари ва молиявий ёрдами остида фаолият юритади, унинг мақсади — Исроил давлати ва унинг иттифоқчиларига зарар етказишдир.
Улар денгиз ҳудудларидан фойдаланиб, ўз кучини намойиш этади ва халқаро кема қатнови ҳамда савдо йўлларига қарши террорчилик фаолиятини амалга оширади, дея даъво қилган Исроил мудофаа армияси.
Исроил ҳужумлар ҳусийларнинг яҳудий давлатига учирилган ракета ва дронларга жавоб эканини таъкидлаган.
Times of Israel нашри ёзишича, 22 август куни Яман ҳусийлари Исроилга дрон ва кассетали ўқ-дорилар ўрнатилган баллистик ракета учирган. Бу ҳар куни ҳужумга учраётган Ғазодаги фаластинликлар билан бирдамлик белгиси экани таъкидланган.
Изоҳ (0)