Шимолий Корея 2025 йилнинг январь ва февраль ойларида Россияга қўшимча уч мингга яқин ҳарбий хизматчи юборди. Бу ҳақда Жанубий Корея штаб бошлиқлари бирлашган қўмитасига таяниб Associated Press хабар берди.
Маълум қилинишича, Пхеньян Москвага тобора кўпроқ ракеталар, артиллерия ускуналари ва ўқ-дорилар юбормоқда. Шимолий Корея фронтдаги вазиятга қараб қурол-яроғ етказиб беришни ошириши мумкин. Шу пайтгача етказиб берилган ўқ-дорилар ва ҳарбий техника орасида қисқа масофали баллистик ракеталар, 170 миллиметрли ўзиюрар гаубитсалар ва 220 га яқин 240 миллиметрли баравар ўт очиш реактив тизимлари бор.
Россия ва Шимолий Корея уруш бошланганидан кейин ҳарбий соҳадаги ҳамкорликни кучайтира бошлади. 2024 йил июнь ойида Россия президенти Владимир Путин Шимолий Кореяга ташриф буюриб, Ким Чен Ин билан ҳужум содир бўлган тақдирда бир-бирини қўллаб-қувватлашни назарда тутувчи, шунингдек, Ғарб санкцияларига қарши ҳамкорликни ўз ичига олган кенг қамровли стратегик шартнома имзолади.
Украина армияси Курск вилоятида шимолий кореялик икки аскарни асирга олди. Президент Владимир Зеленский 12 январь куни улар сўроққа тутилгани акс этган видеони эълон қилди. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлади.
Украина армияси бундай йўқотишларни бир қатор сабаблар билан изоҳламоқда. Жумладан, Шимолий Корея аскарлари “Иккинчи жаҳон уруши” давридаги каби пиёда ҳужум қилган ва Украина дронлари ҳамда артиллерияси учун осон нишон бўлган. Улар одатда нишонга олинсалар ҳам, ҳужумни давом эттирган.
Бундан ташқари, асирга тушмаслик учун Шимолий Корея аскарлари ўзларини гранаталар билан портлатган. Шунингдек, КХДР аскарлари тил билан боғлиқ муаммо туфайли Россия қўшинлари билан контактга яхши киришмаган. Ҳатто тасодифан Россия позицияларига ҳужум қилган. Шимолий Корея Москвани қўллаб-қувватлаш учун 100 минггача аскар беришга тайёрлигини маълум қилгани айтилмоқда.
Изоҳ (0)