Жанубий Корея КХДР Сариқ денгиз томонга қанотли ракета учирганини маълум қилди

Шимолий Корея Сариқ денгиз томон бир нечта қанотли ракеталарни учирди, улар Корея яримороли ва Хитой ўртасидаги сувга қулади, деб хабар берди Жанубий Корея Қуролли кучлари бош штаби 24 январь куни эрталаб. Жанубий Корея ҳарбийлари америкалик мутахассислар билан биргаликда воқеа тафсилотларини таҳлил қилмоқда.

Ядровий ва ракета дастурлари каби халқаро санкциялар остидаги баллистик ракеталардан фарқли ўлароқ, қанотли ракеталарнинг учирилиши Шимолий Корея учун техник жиҳатдан жазо чораларига сабаб бўлмайди. Бироқ бу ракеталар ядро каллакларига ҳам эга бўлиши мумкин, деб эслатади DPA агентлиги. 

Шимолий Кореянинг ракета ва ядро синовлари 

Бундан бир неча кун олдин, 19 январда Шимолий Корея “Хэиль-5-23” сувости ядро қуроли тизимини — ядровий каллак билан жиҳозланиши мумкин бўлган сувости дронини синовдан ўтказаётганини эълон қилди. “Хэиль-5-23” тизимининг мавжудлигини мустақил тасдиқлаш имконсиз. Пхеньянга кўра, сувости дрони илк бор ўтган йилнинг март ойида синовдан ўтказилган ҳамда душман кемалари ва муҳим портларга кутилмаган ҳужумлар уюштиришга қодир. 

15 январь куни Шимолий Корея гипертовушли ракетани муваффақиятли синовдан ўтказганини эълон қилди. Жанубий Корея ҳарбийларига кўра, ўрта масофага мўлжалланган ракета минг километрга яқин масофани босиб ўтиб, Япон денгизига қулаган.

14 январь куни Шимолий Корея Япония томон баллистик ракета учирди — бу 2024 йилда ушбу турдаги қуролнинг илк синови бўлди. Япония Қирғоқ қўриқлаш хизмати ва мамлакат мудофаа вазирлиги маълумотларига кўра, ракета шарқий қирғоқдан отилган ва Япониянинг махсус иқтисодий зонаси ташқарисида денгизга қулаган.

Корея яриморолида кескинлик кучаймоқда

Январь ойи бошида Шимолий Корея Жанубий Корея ороллари томон 200 тадан ортиқ снаряд отганди. Бунга жавобан Жанубий Корея Қуролли кучлари ўқ отиш машқларини ўтказди.

Ўтган йил декабрь ойида Пхеньян бир неча синовлардан сўнг, Шимолий Корея томонига кўра, парвоз масофаси 1002,3 километрни ташкил этган қитъалараро ракетани учирди. Ноябрь ойида КХДР коинотга ўзининг биринчи ҳарбий разведка сунъий йўлдошини юборди.