Россия Украинадаги урушда қўллаб-қувватлагани учун Шимолий Кореяга компенсация сифатида камида битта “Пансир” ҳаво ҳужумидан мудофаа тизимини топширган. Бу ҳақда 11 та давлат томонидан тузилган Халқаро санкциялар мониторинги гуруҳи ҳисоботида маълум қилинди.
Гуруҳ разведка маълумотларидан фойдаланган, ҳисобот асосан Россиянинг Шимолий Корея билан ҳамкорлигига бағишланган. Унга кўра, самолёт, вертолёт, қанотли ракета ва дронларни йўқ қилишга мўлжалланган “Пансир” тизими Шимолий Корея ҳаво мудофаа тизимини кучайтиради. КХДРдаги мавжуд тизимлар самарасиз ва эскиргани айтилмоқда.
Шимолий Кореянинг янги “Чхё Хён” эсминецидаги қуроллар Россиянинг “Пансир” мажмуасига ўхшаш экани таъкидланган. Россия КХДРга замонавий радиоэлектрон кураш воситалари, сигнални бузувчи техникалар бергани, шунингдек, баллистик дастурни ривожлантиришга кўмаклашаётгани айтилмоқда. Хусусан, Москва ракета синовлари натижалари бўйича фикр-мулоҳазаларни Пхеньянга тақдим этмоқда. Бу эса нишонга муваффақиятли олиш имконини беради.
Бу Россия БМТ Хавфсизлик кенгашининг доимий аъзоси сифатида овоз берган Пхеньянга нисбатан БМТ Хавфсизлик кенгаши резолюцияларининг бузилишидир, дейилади хабарда.
АҚШ Конгресси таҳлилий хизматига кўра, Россиянинг техник ёрдами КХДРнинг ядровий салоҳиятини ҳам сезиларли даражада оширган. Пхеньян 90 тагача ядровий каллак ишлаб чиқариш учун етарли материал тўплагани айтилмоқда. Улардан 50 га яқини аллақачон йиғилган бўлиши мумкин.
Таҳлилчилар фикрича, Россиянинг ёрдами Шимолий Кореянинг урушда кўрсатган ёрдами билан боғлиқ. Курск вилоятидаги ҳужумини қайтаришда 14 минг нафар шимолий кореялик иштирок этгани прогноз қилинган. КХДР ўқ-дорилар етказиб бергани ҳам маълум қилинган.
2023 йил сентябрь ойидан бери Шимолий Корея Россияга 20 мингдан ортиқ ҳарбий юк контейнерларини етказиб берган. Улар 9 миллионга яқин артиллерия ўқ-дорилари, 100 дан ортиқ баллистик ракеталар ва 200 дан ортиқ оғир артиллерияни ўз ичига олган. Бу таъминот учта бригадани тўлиқ жиҳозлаш учун етарли. Жанубий Кореянинг КIDА таҳлил маркази ҳисоб-китобларига кўра, Шимолий Корея 20 миллиард доллардан кўпроқ даромад олган.
Изоҳ (0)