Жанубий Корея чегара чизиғи яқинида Шимолий Кореянинг 180 та ҳарбий самолётлари аниқланганидан кейин, ўзининг камида 80 та қирувчисини, шу жумладан, F-35А самолётларини ҳам ҳавога кўтарди. Бу ҳақда Yonhap агентлиги хабар берди.
Агентлик жанубий кореялик ҳарбийларга таяниб хабар беришича, КХДР самолётлари фаоллиги 4 ноябрь куни 11:00 дан 15:00 га қадар (Тошкент вақти билан 7:00 дан 11:00 гача) кузатилган.
Шимолий Корея ҳарбий авиацияси бир қанча ҳудудларда, шу жумладан, Шарқий (Япон) ва Ғарбий (Сариқ) денгизлар ҳудудида парвоз қилган.
Аввалроқ АҚШ ва Жанубий Корея мудофаа вазирлари Ллойд Остин ва Ли Чжон Соп Шимолий Корея томонидан ҳар қандай ядро ҳужуми Ким Чен Иннинг режимига нуқта қўйиши ҳақида огоҳлантирган эди. Уларнинг сўзларига кўра, улар Пхеньяннинг номақбул хатти-ҳаракатларига «қатъий жавоб» кўрсатади.
Шунингдек, АҚШ Россия ва Хитой КХДРга ўз таъсирини ўтказиб, уни ядро синовлари ўтказиш фикридан қайтаришини истаётгани маълум бўлди. Пхеньян бир неча марта ракеталар учиргач, АҚШ БМТ Хавфсизлик кенгашига мурожаат қилиб, 4 ноябрь, жума куни Шимолий Корея бўйича мажлис ўтказишни сўраганди. Эслатиб ўтамиз, аввалроқ КХДР сўнгги уч кун ичида тўртинчи марта Япон денгизига қарата ракета учирди, бу сафар Пхеньян учта қисқа масофали баллистик ракетани учирган. Ракеталар парвозлари АҚШ ва Жанубий Кореянинг Vigilant қўшма ҳарбий ҳаво машғулотлари фонида юз бермоқда, КХДР унга қарши чиққан. Машқлар 31 октябрь куни бошланган бўлиб, 4 ноябрга қадар давом этади. Манёврларга 240 дан ортиқ самолётлар, шу жумладан, Американинг такомиллаштирилган F-35А кўринмас қирувчилари жалб қилинган. КХДР Сеул ва Вашингтоннинг мана шу ва бошқа машғулотлари сабабли, «Корея ярим ороли қизғин нуқтага айлантириб қўйилгани, у ерда ҳарбий кескинлик дунё бўйича энг кучли экани, минтақадаги хавфсизлик муҳити эса янада жиддийлашганини айтганди. Октябрь ойида Шимолий Корея беш мартадан кўпроқ ракеталар учирди, шунингдек, қанотли ракеталарни синовдан ўтказди. Бундан ташқари, Жанубий ва Шимолий Корея ҳарбийлари ўртасида 24 октябрь куни отишма юз берди: КХДР кемаси Сариқ денгизда демаркация чизиғини кесиб ўтгани туфайли Сеул огоҳлантирувчи ўт очди, Пхеньян бунга жавобан баравар ўт очиш реактив тизимларидан 10 та снаряд учирди. Мавзуга доир:
Изоҳ (0)