Россия хавфсизлик кенгаши котиби Сергей Шойгу 17 июнь куни Россия президенти Владимир Путиннинг махсус топшириғи билан Шимолий Корея пойтахти Пхеньянга келди. Бу ҳақда Anadolu хабар берди.
Котиб Пхеньянга аввалги ташриф чоғида эришилган келишувларни амалга ошириш доирасида КХДР раҳбарияти билан музокаралар ўтказиш учун келгани айтилмоқда. Ушбу келишувлар Россия Федерацияси ва КХДР ўртасида ҳар томонлама стратегик шериклик тўғрисидаги шартнома доирасида амалга оширилаётгани маълум қилинган.
Шойгу Шимолий Кореяга сўнгги 3 ой ичида учинчи бор келди. 4 июнь куни бўлиб ўтган сўнгги учрашувда Шойгу ва КХДР раҳбари Украинадаги вазият ва Курск вилоятини тиклашни муҳокама қилганди. Учрашувда имзоланган Кенг қамровли стратегик шериклик тўғрисидаги шартномага мувофиқ Россия ва КХДР ўртасидаги икки томонлама муносабатларни ривожлантириш истиқболлари муҳокама қилинганди.
Бунгача эса котиб 21 март куни КХДРга ташриф буюрган эди. Ўшанда уни Ким Чен Ин шахсан қабул қилган. Шойгунинг маълум қилишича, у КХДР раҳбарига Россия президенти Владимир Путиннинг мурожаатини етказган, Украина ва Россия ҳамда АҚШ ўртасида мулоқот бошланиши масалалари муҳокама қилинган.
Изоҳ (0)