Шимолий Кореянинг пойтахти Пхеньянда компьютерлари бўлмаган биринчи компьютер клуби очилди. Мамлакат раҳбари Ким Чен Ин объектга ташриф буюрди. Бу ҳақда NK News хабар берди.
Маълум қилинишича, клуб 300 кишига мўлжалланган бўлиб, фуқароларнинг моддий ва маданий фаровонлигига ҳисса қўшишга қаратилган. Клубдан олинган суратларда компьютер ва мониторлар йўқлигини кўриш мумкин. Шу билан бирга, клубда кўплаб билярд столлари ва ўйин креслолари мавжуд.
Манбага кўра, КХДР расмийлари ўйин материаллари мазмунини синчковлик билан назорат қилади. Клубга келадиганларга хорижий ўйинларнинг сиёсатга хавф солиши мумкин бўлган қисмлари олиб ташланган версиялари таклиф қилиниши мумкин. Бу лойиҳа мамлакатда дам олиш инфратузилмасини кенгайтириш дастурининг бир қисми бўлиши кутилмоқда.
КХДРнинг биринчи компьютер клубида қандай ускуналар ишлатилиши ва қачон етказиб берилиши кутилаётганига аниқлик киритилмаган. Эҳтимол, Шимолий Корея санкцияларни четлаб ўтиш учун зарур бутловчи қисмларни олиб кириш йўлларини излаши керак бўлади.
Дунёга машҳур КХДР хакерлари
Шимолий Корея хакерлари сўнгги йилларда бир нечта йирик киберҳужумлар уюштириб, глобал хавфсизликка таҳдид қилмоқда. 2017 йилдан бери улар қарийб 3 миллиард долларлик криптовалюталарни ўғирлашга муваффақ бўлган, шу жумладан 2023 йилда 600 миллиондан 1 миллиард долларгача маблағ ўғирланган. Ўша йилнинг февраль ойида Шимолий Корея хакерлари Bybit крипто биржасига қарашли 1,5 миллиард долларлик рақамли валютани ўзлаштирган.
КХДР хакерлари, шунингдек, Жанубий Корея сиёсатчиларига киберҳужумлар уюштириб, уларнинг шахсий маълумотларини ўғирлагани ҳақида маълумотлар мавжуд. Бунинг оқибатида улар Жанубий Кореяга нисбатан 626 миллион АҚШ доллари миқдорида зарар етказган. Бундан ташқари, Шимолий Корея хакерлари АҚШ ва бошқа давлатларнинг ҳарбий маълумотларини ўғирлаш учун глобал кибержосуслик кампанияларини амалга ошираётгани таъкидланади.
Изоҳ (0)