АҚШ Россия ва Хитой КХДРга ўз таъсирини ўтказиб, уни ядро синовлари ўтказиш фикридан қайтаришини хоҳлаган бўларди. Бу ҳақда юқори мансабли америкалик амалдор Reuters’га маълум қилган.
Вашингтоннинг фикрича, Пекин ва Москвада Шимолий Кореяни ядро қуроли синовларидан воз кечишга кўндиришда ёрдам берадиган таъсир воситалари бор.
«Хитой ва Россия азалдан КХДРнинг ядро дастурига қарши бўлиб келади», — деди агентлик суҳбатдоши. «Улар КХДРни ядро синовлари ўтказмасликка кўндиришга уриниш учун ўз таъсир воситаларини қўллашига ишонамиз ва албатта, буни кутяпмиз», — деди у.
Шу билан бирга, мансабдор Пхеньян бундай синовларни қачон ўтказиши мумкинлиги ҳақида ҳеч нарса дея олмади. АҚШ Шимолий Корея 2017 йилдан буён биринчи марта ядро синовларини қайта бошлашга тайёрланаётгани ҳақида май ойидан буён айтиб келади.
«Улар буни қилиши мумкин, деб ўйлаймиз», — деди у.
Пхеньян ядро синовларини қайтадан бошлашни Хитойдаги сайловлар ва Шимолий Кореяда COVID-19 авж олиши туфайли кейинга қолдирган бўлиши мумкин.
Пхеньян бир неча марта ракеталар учиргач, АҚШ БМТ Хавфсизлик кенгашига мурожаат қилиб, 4 ноябрь, жума куни Шимолий Корея бўйича мажлис ўтказишни сўраганди.
Эслатиб ўтамиз, аввалроқ КХДР сўнгги уч кун ичида тўртинчи марта Япон денгизига қарата ракета учирди, бу сафар Пхеньян учта қисқа масофали баллистик ракетани учирган.
Ракеталар парвозлари АҚШ ва Жанубий Кореянинг Вигилант Сторм қўшма ҳарбий ҳаво машғулотлари фонида юз бермоқда, КХДР унга қарши чиққан. Машқлар 31 октябрь куни бошланган бўлиб, 4 ноябрга қадар давом этади. Манёврларга 240 дан ортиқ самолётлар, шу жумладан, Американинг такомиллаштирилган F-35А кўринмас қирувчилари жалб қилинган.
КХДР Сеул ва Вашингтоннинг мана шу ва бошқа машғулотлари сабабли, «Корея ярим ороли қизғин нуқтага айлантириб қўйилгани, у ерда ҳарбий кескинлик дунё бўйича энг кучли экани, минтақадаги хавфсизлик муҳити эса янада жиддийлашганини айтганди.
Октябрь ойида Шимолий Корея беш мартадан кўпроқ ракеталар учирди, шунингдек, қанотли ракеталарни синовдан ўтказди. Бундан ташқари, Жанубий ва Шимолий Корея ҳарбийлари ўртасида 24 октябрь куни отишма юз берди: КХДР кемаси Сариқ денгизда демаркация чизиғини кесиб ўтгани туфайли Сеул огоҳлантирувчи ўт очди, Пхеньян бунга жавобан баравар ўт очиш реактив тизимларидан 10 та снаряд учирди.
Мавзуга доир:
Изоҳ (0)