«Дарё» нашри 4 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия армияси фронтда ҳужумлар сонини уч марта оширди
Россия армияси фронтнинг алоҳида қисмларида жанговар ҳаракатлар шиддатини сезиларли даражада оширди. Бу ҳақда Украина Қуролли кучлари бош қўмондони Валерий Залужний НАТО ва АҚШнинг Европадаги бирлашган кучлари командири Кристофер Каволи билан телефон суҳбати чоғида маълум қилди.
«Фронтдаги вазиятни муҳокама қилдик. У кескин, лекин назорат остида бўлиб қолмоқда, — деб ёзди Залужний ўз Telegram каналида. — Душман фронтнинг алоҳида ҳудудларида жанговар ҳаракатлар шиддатини уч карра — ҳар куни 80 та ҳужумгача оширган. Жангчиларимиз маҳорати сабаб биз мудофаани ушлаб турибмиз».
Украина қуролли кучларининг 4 ноябрь куни эълон қилинган эрталабки ҳисоботида айтилишича, Россия армияси ҳужум ҳаракатларини Бахмут, Авдеевка ва Новопавловка йўналишларига қаратган.
АҚШ ва Жанубий Корея Ким Чен Ин режимига нуқта қўйиш билан таҳдид қилди
Шимолий Корея томонидан ҳар қандай ядро ҳужуми Ким Чен Иннинг режимига нуқта қўяди. Бу ҳақда АҚШ ва Жанубий Корея мудофаа вазирлари Ллойд Остин ва Ли Чжон Соп огоҳлантирди.Вазирларнинг сўзларига кўра, улар Пхеньяннинг номақбул хатти-ҳаракатларига «қатъий жавоб» кўрсатади.
«Вазир Остин ва мен тасдиқлаймизки, Шимолий Корея томонидан ҳар қандай ядровий ҳужум, шу жумладан, тактик ядро қуролининг қўлланилиши, номақбулдир ва Ким Чен Ин режимининг тугашига олиб келади», — деди Ли Чжон Соп Пентагонда хавфсизлик масалалари бўйича маслаҳатлашув мажлисидан кейин.
Ллойд Остин ва Ли Чжон Соп КХДР томонидан, Вашингтон ва Сеул фикрича, қитъалараро баллистик ракеталар учирилиши ва бошқа ракета синовларидан кейин йиғилиш ўтказган.
Пентагон раҳбарига кўра, маслаҳатлашувлардан кейин у ва Ли Чжон Соп Вигилант Сторм ўқув машқларини узайтиришга қарор қилган. Жанубий Корея ва АҚШ КХДРни «ўзининг вайронкор йўлидан қайрилишга» чақирди.
Аввалроқ АҚШ Россия ва Хитой КХДРга ўз таъсирини ўтказиб, уни ядро синовлари ўтказиш фикридан қайтаришини истаётгани маълум бўлганди. Айни пайтда Шимолий Кореянинг 180 дан ортиқ ҳарбий самолётлари ҳаракатга келгани аниқланганидан сўнг Жанубий Корея қирувчи самолётларини ҳавога кўтарди.
Байден АҚШ Эронни озод этишини маълум қилди
АҚШ президенти Жо Байден Калифорнияда конгрессга бўлғуси оралиқ сайловларга бағишланган нутқида АҚШ Эронни озод этмоқчи эканини маълум қилди, деб ёзади Bloomberg. Байденнинг нутқи Ироқ ва Афғонистонда хизмат қилган америкалик фахрийларга тиббий кўмак кўрсатишга бағишланган. Аммо Шу мавзуда гапираётиб, у тўхтаб шундай деган: «Хавотир олмангиз, биз Эронни озод қилмоқчимиз».
Шундан сўнг президент: «Улар жуда яқин вақтда ўзларини озод этади», — дея қўшиб қўйди. АҚШ президенти нимани назарда тутаётганига аниқлик киритмаган. Reuters маълумотларига кўра, Байден чиқиш қилган жойга Эрондаги намойишчиларни қўллаб-қувватлаб шиорлар кўтариб олган бир неча ўнлаб кишилар келган.
Шундан сўнг Эрон президенти Иброҳим Раисий Жо Байденнинг гапларига жавобан «Эрон 1979 йилги ислом инқилоби пайтида озод қилинган», — дея муносабат билдирди.
Қирғизистон МДҲ давлатлари чегаралари яқинида оғир техникаларни жойлаштиришни тақиқлашни таклиф қилди
Қирғизистон Хавфсизлик кенгаши котиби Марат Имонқулов Мустақил Давлатлар Ҳамдўстлиги (МДҲ) мамлакатлари чегаралари яқинида оғир техникаларни жойлаштиришни тақиқлашни таклиф қилди. Бу ҳақда «24.kg» хабар берди.
МДҲга аъзо давлатлар Хавфсизлик кенгашлари котибларининг йиғилишида Марат Имонқулов долзарб муаммо ва таҳдидлар камаймаётгани, аксинча улар мутацияга учраб, кўп йўналишли ва янада хавфли бўлиб бораётганини таъкидлади. Ҳар қандай давлат турли йўналишлардан зарба олиб, бир зумда геосиёсий ўйиннинг нишони ёки қуролига айланиши мумкин, дейди у.
«Якка бир давлат бутун бошли таҳдидларга ёлғиз дош беролмайди. Халқаро хавфсизлик кимнингдир агрессив амбицияларига боғлиқ бўлмаслиги керак. Беқарорлаштиришга қаратилган ҳар қандай уринишларга самарали қаршилик кўрсатиш талаб этилади. Шу боис тараққиёт йўлида барқарорлик ва тинчлик манфаатлари йўлида ўзаро ҳамкорликни йўлга қўйиш, шунингдек, муроса топиш бўйича Ҳамдўстликка аъзо барча давлатлар ва жаҳон ҳамжамиятининг умумий интеграллашган фаолиятига эҳтиёж бор», — деган Имонқулов.
Бундан ташқари, МДҲ форматида ваколатли тузилмалар ўртасида тезкор ахборот алмашинувини ошириш таклиф этилди.
Изоҳ (0)