Жанубий Корея Демократик партиясининг президентликка номзоди Ли Чже Мён КХДР билан алоқа каналларини қайта тиклаш ва Корея иқтисодиётини жонлантириш мақсадида Кореялараро ҳамкорликни ривожлантиришни ваъда қилмоқда, Бу ҳақда у ўзининг Facebook саҳифасида маълум қилди.
“Иқтисодиётни жонлантириш ва фуқаролар ҳаётида барқарорликни таъминлаш учун “Корея яриморолидаги хатарлар”ни бартараф этиш зарур. Биз Кореялараро алоқа каналларини, жумладан, ҳарбий ишонч линиясини тиклаш ва кескинликни келтириб чиқарадиган ҳаракатлардан ўзаро воз кечишга эришиш орқали вазиятни назорат қилиб борамиз”, деди президентликка номзод.
2023 йил апрель ойидан бошлаб Шимолий Корея Кореялараро ҳарбий алоқа линияси орқали режалаштирилган қўнғироқларга жавоб беришни тўхтатган эди.
2023 йилда Шимолий Корея разведка сунъий йўлдошини учирганидан сўнг, Сеул 2018 йилдаги ҳарбий кескинликни юмшатиш тўғрисидаги шартномага қисман риоя қилмасликка қарор қилди. Бунга жавобан Пхеньян бу келишувларга энди тўлиқ амал қилмасликларини эълон қилди. Жанубий Корея эса 2024 йилнинг ёзида қолган қоидаларга риоя қилишни тўхтатди.
“Жануб ва Шимол ўртасидаги мулоқот, алмашинувлар ва халққа маъқул бўлган ҳамкорликни ривожлантиришга эришамиз”, деди сиёсатчи.
Шимолий Корея раҳбари Ким Чен Ин эса яқинда Жанубий Кореянинг асосий душман мақомини конституциявий мустаҳкамлашни таклиф қилган ва “Халқ республикасини ютиб юборишга интилаётган Жанубий Корея” билан бирлашишнинг иложи йўқлигини таъкидлаганди.
“Шимолий Кореянинг ядросизланиш жараёни тўхтатилганига анча вақт бўлди. Уларнинг ядровий ва ракета салоҳияти кун сайин ортиб бормоқда. Корея яриморолида тинчликни таъминлаш ва Шимолий Корея ядровий муаммосини ҳал қилишда амалий тараққиётга эришиш учун биз АҚШ билан яқиндан ҳамкорлик қиламиз ва халқаро ҳамжамият билан кўп томонлама ҳамкорликка интиламиз”, дейди Ли Чже Мён.
Шу билан бирга, агар сайланса, Пхеньяннинг “ассиметрик таҳдидларига жавоб бериш учун тайёргарликни” кучайтиришини таъкидлаган.
Изоҳ (0)