«Дарё» нашри 18 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
АҚШда Украинага етказиб бериш ваъда қилинган қурол-яроғ захиралари тугаб бормоқда — CNN
АҚШ ҳарбий ёрдам доирасида Украинага етказиб беришни ваъда қилган баъзи қурол-яроғ ва ўқ-дорилар захираларининг камайиши муаммосига дуч келди. Бу ҳақда CNN ҳукуматдаги бир нечта манбаларига таяниб хабар берди.
Хусусан, гап 155 миллиметрли артиллерия ўқ-дорилари ва Stinger кўчма зенит-ракета мажмуалари ҳақида бормоқда. Ҳозирча захиралари қисқариб кетган қуроллар ва ўқ-дорилар ишлаб чиқаришни тезкорлик билан йўлга қўйиш, шунингдек, уларни Европадаги иттифоқдошларидан сўраш имконияти бўлмаяпти.
Шу билан бирга, АҚШ ҳукумати ҳеч қандай шароитларда мамлакат хавфсизлиги таҳдидга юз тутмаслигини ҳамда қурол етказиб беришда бунинг АҚШ стратегик захираларига ва мудофаа режаларига таъсири ҳисобга олинишини таъкидламоқда.
«Бу тобора қийин бўлиб бормоқда», — дея CNN’га маълум қилди разведка бўйича қўмита аъзоси конгрессмен Майк Куигли Украинага қурол етказиб беришни изоҳлар экан. «Бу уруш бир неча кунда тугайди, деб ўйлагандик, энди эса бир неча йиллар давом этиши мумкин. Глобал етказиб беришлар занжири узилаётган бир пайтда, Ғарб бундай юқори даражадаги эҳтиёжларни қондиришга жуда қийналади», — деди у.
Ўз навбатида Пентагон матбуот котиби Патрик Райдер CNN’ни ишонтиришича, АҚШ Украинани «қанча талаб этилса, шунча» қўллаб-қувватлашда давом этади. Украинага қурол етказиб бериш ҳеч ҳам АҚШнинг мудофаа қобилиятини пасайтирмайди, дея муносабат билдирган.
АҚШ — Украинанинг асосий иттифоқчиларидан бири. Уруш бошланганидан кейин Америка Украинага бир неча марта кўп миллиардлик ҳарбий ёрдам пакетларини ажратди, шунингдек, у учун ижара ёки узоқ вақт бўлиб-бўлиб тўлаш шарти билан қурол-яроғ етказиб бериш имконини берувчи ленд-лиз дастурини ишга туширди.
МАГАТЭ Россияни Запорожье АЭСдан чиқиб кетишга чақирувчи резолюция қабул қилди
Атом энергияси бўйича халқаро агентлик (МАГАТЭ) бошқарувчилар кенгаши резолюция қабул қилиб, унда Россияни Запорожье атом электр станциясидан ҳарбий ва бошқа ходимларини зудлик билан олиб чиқишга чақирди.
Резолюция муаллифлари Россияни станцияга эгалик бўйича асоссиз даъволардан воз кечишга ва унинг хавфсизлигини таъминлаш учун Украина томонининг ЗАЭСга кириб, станция устидан назоратни тиклашига рухсат беришга чақирди.
Reuters хабарига кўра, бу МАГАТЭнинг Украинада уруш бошланганидан бери Россияни Украина ядровий иншоотларида ҳарбий ҳаракатларни тўхтатишга чақирувчи учинчи резолюцияси. Янги ҳужжат ёпиқ овоз беришда кенгаш таркибига кирувчи 35 давлатдан 24 тасининг вакиллари томонидан қўллаб-қувватланган. Яна етти киши қарши овоз берган.Reuters манбаларига кўра, улар орасида Россия ва Хитой бор.
Запорожье атом электр станцияси Россия Украинага бостириб кирганидан кўп ўтмай рус ҳарбийлари қўлига ўтганди. Ўшандан бери станция бир неча бор ўққа тутилган, бунда Россия ва Украина бир-бирини айблаган.
КХДР шарққа қарата катта масофали баллистик ракета учирди
Шимолий Корея Корея ярим оролидан шарққа қарата катта масофали баллистик ракета учирди. Бу ҳақда Yonhap агентлиги Штаб бошлиқлари бирлашган қўмитасига таяниб хабар бермоқда. Ҳарбийлар тахмин қилишича, гап қитъалараро баллистик ракета ҳақида бораётган бўлиши мумкин. Айни пайтда мутахассислар унинг парвози параметрларини таҳлил қилмоқда.
КХДР ракета учиргани ҳақида Япония Мудофаа вазирлиги ҳам хабар берди. Ҳарбийлар парвоз ҳақида маҳаллий вақт билан тахминан 10:14 да (Тошкент вақти билан 6:14) хабар берган. Идора ҳам унинг қитъалараро ракета бўлганини тахмин қилмоқда.
Вазирлик маълумотларига кўра, снаряд Корея ярим оролининг ғарбий соҳилларидан учирилган ва Япония иқтисодий зонасига — Хоккайдо оролидан ғарбга, денгизга келиб тушган.
«Яна бир марта қатъиян таъкидлайман: бу мутлақо номақбул», — дея ҳодисага изоҳ берди Япония бош вазири Фумио Кисида. Бу йил бошидан буён КХДР томонидан 34 марта ракета учирилишидир.
Шимолий Корея кетма-кет икки кундан буён баллистик ракеталар учирмоқда. Бир кун аввал ҳам КХДР ҳарбийлари Япон денгизига қарата снаряд отганди. Шу куниёқ Жанубий Корея ва АҚШ Мудофаа вазирликлари ракетага қарши мудофаа бўйича маслаҳатлашувлар ўтказди.
Давлат бюджетини режалаштиришда жамоатчилик назорати зарур
Давлат бюджети маблағларининг мақсадли сарфланиши доим муаммо бўлиб келган. Бу ҳақда молия вазири Тимур Ишметов Сенат ялпи мажлисида маълум қилди, дея хабар бермоқда «Дарё» мухбири. Тимур Ишметовнинг таъкидлашича, бюджетни режалаштиришда интизомни шакллантириш қийин кечмоқда.
«Давлат бюджети маблағларининг мақсадли сарфланиши доимо муаммо бўлиб келган. Аввало, бу масала вазирликларда ишни ташкил этиш билан боғлиқ. Бу муаммони бирлашиб ҳал қилиш зарур. Бюджетни шакллантириш графиги бор.
Масалан, 2023 йилнинг давлат бюджетини шакллантиришда ҳеч кимдан ўз вақтида, сифатли маълумот ололмаяпмиз. Рақамлар қайта-қайта кўриб чиқилаверади. Вазирликлар янги лойиҳалар вақтини суриш, уларни ҳукуматга чиқариш, қарор қабул қилишни айтади, «шу топшириқни бажариш керак», дейди. Молия вазири сифатида «йўқ, бунга пул бериш керак эмас», дея айта олмаймиз.
Мана ҳозир 2022 йил бюджетига ўзгартириш киритиш масаласини кўриб чиқяпмиз. Тўғри тушуниш керакки, бюджет ресурслари чекланган. Биринчи навбатда энг муҳим масалаларга пул ажратишни ўрганишимиз керак. Вазирликларнинг бюджет маблағларидан фойдаланиш жараёнини назорат қилиш тизими яратилиши керак.
Давлат харидлари бўйича аниқланаётган камчиликлар очиқланаётгани ҳам бир томондан назорат тизими ишининг ижобий томони сифатида кўриш мумкин. Яна бир оғриқли масала — бюджетдан ташқари жамғармалар маблағларини сарфлаш. Аслида у ҳам халқнинг пули. Кўплаб шу каби жамғармалар маблағлари ходимлар ойлик-маошларига қўшиб берилган. Иккинчидан эса капитал харажатларга, яъни қурилишларга сарфланган. Аслида бундай қурилишларни инвестиция дастури доирасида амалга ошириш лозим».
Тимур Ишметовнинг қўшимча қилишича, муаммога жамоатчилик назорати ҳам муҳим ечимлардан бири. «Жамоатчилик назоратини таъминлаш учун барча бюджет маълумотлари очиқлигини таъминлаш керак. Очиқ бюджет портали бор, лекин Кўпчилик ундан фойдаланишни билмайди. Маълумотларни осон топиш механизми такомиллаштириб борилса, жамоатчиликнинг буни назорат қилишга қурби етади», — дейди вазир.
Аввалроқ Тимур Ишметов 2023 йил 1 январдан давлат харидлари портали янги шаклда ишга туширилишини, ундаги барча маълумотлар таҳлили билан чиқилишини айтганди.
Изоҳ (0)