Корея Республикасининг янги сайланган президенти Ли Же Мёнг рафиқаси билан қасамёд қилиш маросимига ташриф буюрди. Инаугурация маросими чўзиб ўтирилмасдан, сайлов натижалари эълон қилиниши биланоқ — анъанавий икки ойлик ўтиш даврисиз ўтказилди. Бу ҳақда Yonhap нашри хабар бермоқда.
3 июнь куни Жанубий Кореяда муддатидан олдин президент сайлови ўтказилди. Президентлик учун асосий номзодлар Ли Же Мёнг ва унинг бош рақиби, ҳукмрон консерватив “Халқ кучи” партиясидан Ким Мун Су эди. Сайловлар якунланишига бир соат қолганида сайловчилар фаоллиги 28 йил давомидаги рекорд даража — 77,8 фоизни ташкил этди.
Маълумотларга кўра, 100 фоиз сайлов бюллетенлари қайта ишлангандан сўнг, мухолифат номзоди Ли Же Мёнг 49,42 фоиз овозни қўлга киритган. Унинг рақиби, ҳукмрон консерватив “Халқ кучи” партиясидан номзод Ким Мун Суга эса фуқароларнинг 41,15 фоизи овоз берган.
Ли Же Мёнг муддатидан олдин ўтказилган сайловда ғалаба қозонди. У шунчаки ғалаба қозонибгина қолмади. Балки мамлакат тарихидаги энг кўп овозни — 17 280 000 та овозни тўплади. Сайловчилар аниқ талаблар билан сайлов участкаларига келишди.
Бу сайловлар ўтган йилнинг декабрь ойида ҳарбий ҳолат жорий этилгани сабабли унинг собиқ рақиби Юн Сок Елга импичмент эълон қилинганидан сўнг ўтказилди. Конституциявий суд бу ҳодиса мамлакатда сўнгги ўн йилликлардаги энг жиддий сиёсий инқирозни келтириб чиқарди, деб ҳисоблади.
“Мен халқ олдида тантанали қасамёд қиламанки, конституцияга риоя қилган ҳолда, миллатни ҳимоя қилиб, ватанни тинч йўл билан бирлаштиришга интиламан, халқнинг эркинлиги ва фаровонлигига кўмаклашаман ҳамда миллий маданиятимизни ривожлантириб, президентлик вазифамни виждонан бажараман”, деди инаугурация маросимида Ли Же Мёнг.
Таъкидланишича, маҳаллий газеталарнинг бугунги сонининг биринчи саҳифалари фақат янги президент ҳақида. Айнан у АҚШ президенти Дональд Трампнинг тариф сиёсати ва Шимолий Корея ядро дастури билан боғлиқ муаммоларни ҳал қилиши керак бўлади.
Ли Же Мёнг ўзининг инаугурация нутқида глобал муаммолар ва ўзгаришлар шароитида амалий дипломатиянинг муҳимлигини таъкидлаган. У мавжуд инқирозларни мамлакат манфаатларини таъминлаш имкониятларига айлантириш ваъдасини берган.
Маълум қилинишича, Ли Же Мёнгнинг биринчи суҳбати АҚШ президенти Дональд Трамп билан бўлиши кутилмоқда.
Изоҳ (0)