Шимолий Корея яқин ҳафталарда сунъий йўлдош учириши ҳақида Японияга билдириш юборди. Пхеньян Токиони сунъий йўлдошни 31 май—11 июнь оралиғида учириш режаларидан хабардор қилган, деб ёзмоқда DW.

Космик аппаратнинг учирилиши Шимолий Корея томонидан орбитага ҳарбий разведка сунъий йўлдошини жойлаштиришга уриниш бўлиши тахмин қилинмоқда. Мутахассисларнинг фикрича, “жосус” сунъий йўлдошни учириш орқали КХДР ўз кузатувини кучайтиришга ва можаро юзага келган тақдирда, душманга аниқроқ зарба беришга ҳаракат қилади.

Япония ва Жанубий Корея ҳукуматлари Бирлашган Миллатлар Ташкилотининг ракета синовларини тақиқлаш ҳақидаги резолюциясига ишора қилиб, Шимолий Корея расмийларидан сунъий йўлдошни учириш режаларидан воз кечишни талаб қилди.

Хусусан, Токио аппаратни йўқ қилиш билан таҳдид қилди, чунки Пхеньян томонидан ҳар қандай ракета учирилиши Япония ҳудудлари учун хавф туғдиради.

Япония бош вазири Фумио Кисида Шимолий Кореянинг ҳар қандай ракетани учириши БМТ Хавфсизлик Кенгашида қабул қилинган Шимолий Кореянинг ядровий ва ракета фаолиятини қораловчи резолюцияларни жиддий бузиш эканини таъкидлади.

“У сунъий йўлдош деб аталса ҳам, уни баллистик ракета ёрдамида учириш БМТ Хавфсизлик Кенгаши резолюцияларини бузиш бўлади ва одамлар хавфсизлигига таҳдид солувчи жиддий муаммо келтириб чиқаради”, — деди Кисида.

Жанубий Корея Ташқи ишлар вазирлиги ҳам тегишли баёнот билан чиқди:

“Ҳукуматимиз минтақада тинчликка таҳдид солувчи провокацияларни содир этиш оқибатларидан қатъий огоҳлантиради ва ноқонуний учириш режасидан зудлик билан воз кечишга чақиради”.

Сеул АҚШ, Япония ва халқаро ҳамжамият билан ўзаро ҳамкорлик орқали “провокацияларга қатъий жавоб беради”, дея қўшимча қилган вазирлик.

Япония қирғоқ хавфсизлик хизмати ракета Сариқ денгиз, Шарқий Хитой денгизи ва Филиппиннинг Лузон ороли шарқидаги сувларга қулаши мумкинлидан огоҳлантирди.

Расмий Токио сунъий йўлдошнинг учирилишини қурол синови деб билмоқда. Япония ракетага қарши мудофаа тизимини шай ҳолатга келтирди ва ўз ҳудудига таҳдид соладиган ҳар қандай аппаратни уриб туширишини маълум қилди. Бундан ташқари, бош вазир Кисида расмийларга АҚШ ва Жанубий Корея билан яқиндан ҳамкорлик қилишни буюрди, деб таъкидлайди AFP.

18 апрель куни якунига етган “Еттилик гуруҳи” (G7) давлатлари ташқи ишлар вазирларининг Япониядаги йиғилишида иштирокчилар Шимолий Кореяни ядро қуроли ёки баллистик ракеталарни ортиқ синовдан ўтказмасликка чақирган. Улар Шимолий Кореянинг янги ракета синовларига “тезкор, бирлашган ҳолда ва ҳал қилувчи халқаро жавоб” ваъда қилган.