Корея Халқ Демократик Республикасида мамлакат раҳбари Ким Чен Ин иштирокидаги янги эсминецни сувга туширилиш маросимида бахтсиз ҳодиса юз берди. Сув сиғими беш минг тонна бўлган ҳарбий кема масъул раҳбариятнинг хатоси туфайли шикастланган. Бу ҳақда Корея Марказий телеграф агентлиги хабар бермоқда.
Маросим 21 май куни Чхонжин шаҳрида ўтказилган. Сувга тушириш жараёни жиддий техник носозлик билан кечди: нотўғри раҳбарлик ва бошқарувдаги эҳтиётсизлик туфайли аравачанинг параллел ҳаракати таъминланмаган. Натижада кеманинг қуйруқ қисми учун мўлжалланган тушириш аравачаси муддатидан олдин стапелдан чиқиб кетиб, тўсиққа урилган. Бу эса мувозанат бузилишига ва кема тубининг шикастланишига олиб келган. Кеманинг бурун қисми эса стапелдан тушмай қолган.
Воқеани кузатиб турган Ким Чен Ин ҳодисани “оддий эҳтиётсизлик, масъулиятсизлик туфайли содир бўлган, йўл қўйиб бўлмайдиган жиддий авария ва жиноят” деб баҳолаган. У партия марказий қўмитасининг июнь ойидаги пленумига қадар кемани таъмирлашни талаб қилиб, бу “давлат обрўси” масаласи эканлигини таъкидлаган.
Унинг таъкидлашича, пленумда партия Марказий қўмитаси мудофаа саноати ходимлари, Ким Чак номидаги политехника университети, Марказий кема лойиҳалаш институти ва Чхонжин кемасозлик корхонаси ходимларининг хатолари муҳокама қилинади.
Reuters’нинг таъкидлашича, КХДР учун фалокат ҳақида оммавий баёнот бериш камдан кам учрайдиган ҳодиса.
Агентликнинг ёзишича, “Шимолий Кореяда илгари сунъий йўлдошнинг муваффақиятсиз учирилиши ва турар жой биносининг қулаши каби фалокатлар рўй берган. Кейинчалик бу воқеалар мамлакат раҳбариятининг муаммоларни ҳал қилишдаги ролини кўрсатиш учун фойдаланилган”.
Изоҳ (0)