АҚШнинг Теодор Рузвельт авиаташувчиси ҳарбий машғулотларда қатнашиш учун 22 июнь куни Жанубий Кореяга келган. Бу ҳақда Жанубий Корея нашрлари хабарига асосланиб, Reuters маълум қилди.
АҚШ кемаси Жанубий Кореянинг Пусан портида қабул қилинган. Кема АҚШ, Япония ва Жанубий Корея иштирокида Шарқий Хитой денгизида ўтказиладиган машғулотларда қатнашиши билдирилган.
Ҳарбий машғулотлар уч давлат раҳбарларининг Кемп-Девиддаги келишувига асосан ташкил этилаётгани айтилган. 2023 йилнинг август ойида АҚШда эришилган ушбу келишув Хитойнинг Жанубий ва Шарқий Хитой денгизларидаги “хавфли ва тажовузкор хатти-ҳаракатлари”га қарши туришни мақсад қилган.
Расмийлар машғулотларнинг бир қисми Япон денгизида ҳам ўтказилишини билдирган. Машқлар халқаро нормаларни бузмаган ҳолда, Япония ва Корея сувларида амалга оширилиши эълон қилинган.
Бир гуруҳ таҳлилчилар Япон денгизидаги ҳаракатлар Шимолий Корея ва Россияга сигнал юборишни мақсад қилганини билдирган. Чунки, Россия президентининг Шимолий Кореяга ташрифи ва ҳарбий пакт имзоланиши Сеул ва иттифоқчиларининг кескин эътирозига сабаб бўлган эди. Ҳарбий пакт Россия ва КХДР ўртасидаги иттифоқчилик битими сифатида кўрилган.
Манбада айтилишича, Жанубий Корея сўнгги марта бундан 7 ой муқаддам ўз портида АҚШнинг Карл Винсон авиаташувчисини қабул қилган. Ўшанда Шимолий Кореянинг ядровий ва ракета дастурларига қарши туриш учун Сариқ денгиз шарқида ҳарбий машғулотлар ўтказилган эди.
Изоҳ (0)