Жанубий Корея ва АҚШ КХДР учирган ракеталарга жавобан, қўшма синовлар ўтказди ва «ер — ер» синфидаги тўртта ракетани учирди. Бу ҳақда Yonhap агентлиги Жанубий Корея ҳарбийларига таяниб хабар берди.
Жанубий Корея Штаб бошлиқлари бирлашган қўмитаси маълум қилишича, Америка ва Жанубий Корея иккитадан АТАCМС баллистик ракеталарини учирган, улар нишонларга бориб теккан. Снарядлар Япон денгизи томонга йўналтирилган. Синовлар Шимолий Корея ўрта масофали баллистик ракета учирганидан кейин бир кун ўтиб олиб борилган.
Кейинроқ хабар берилишича, Жанубий Корея ҳарбийлари КХДРнинг ракета синовларига жавобан учирган Ҳюнмоо-2 баллистик ракетаси парвоздан кейин кўп ўтмай, базага қулаган.
Мамлакат шимоли-шарқидаги Канвондо провинцияси Каннин шаҳри аҳолиси ёрқин чақнашни кўриб, қаттиқ гумбурлаш овозини эшитган.
Шундан кейин идора синовлар олиб борилган базада ракета қулаб тушганини маълум қилган. Ҳодисада ҳеч ким жабрланмаган.
Бир кун аввал Шимолий Корея Хитой билан чегарадаги Мупенри полигонидан ўрта масофали баллистик ракетани учирганди. Снаряд Япониянинг Хоккайдо ва Аомори префектуралари ҳаво ҳудудига кирди.
Ўша куниёқ АҚШ ва Жанубий Корея Сариқ денгиздаги оролда Ф-15К қирувчи самолёти иштирокида қўшма машғулотлар ўтказди. Самолёт иккита ЖДАМ бомбаларини учирди. Қирувчилар иштирокидаги қўшма машғулотларни Япония ва АҚШ ҳам олиб борди.
Япония Мудофаа вазирлиги маълумотларига кўра, КХДР ракетаси ўрта ёки ундан кўпроқ масофали бўлган ва тахминан 4,6 минг км масофани босиб ўтган. Бу КХДР томонидан учирилган ракеталар парвози ичида энг узоғидир.
Япония ва АҚШ Шимолий Кореянинг синовларини қоралади. Вашингтон КХДР ракетаси юзасидан йиғилиш ўтказишни сўраб БМТ Хавфсизлик кенгашига мурожаат қилмоқчи.
КХДР томонидан учирилган ракета сўнгги икки ҳафта ичидаги бешинчиси бўлди. Охирги марта Пхеньян 1 октябрь куни иккита кичик масофали баллистик ракета учирганди. Уларнинг иккаласи ҳам Япония иқтисодий зонасидан ташқарига, КХДР шарқий соҳиллари яқинига қулаган.
Изоҳ (0)