Дунёнинг тўққизта ядровий давлати — Россия, АҚШ, Буюк Британия, Франция, Хитой, Ҳиндистон, Покистон, Шимолий Корея ва Исроил ўз ядровий арсеналларини модернизация қилишни давом эттирмоқда, улардан баъзилари 2022 йилда уруш фонида янги ядровий қурол тизимларини жойлаштирган. Бу ҳақда Стокгольм халқаро тинчлик тадқиқот институти (SIPRI) ҳисоботида айтилади.
АҚШ жанговар каллаклари сонини 1 744 тадан 1 770 тага, Россия эса 1 588 тадан 1 674 тага кўпайтирди. Ҳаммаси бўлиб 2 мингга яқин жанговар каллаклар — уларнинг деярли барчаси Россия ва АҚШга тегишли — юқори шай ҳолатга келтирилди, яъни ракеталарга ёки стратегик ҳаво базаларига жойлаштирилди.
2023 йил январь ҳолатига, жойлаштирилган жанговар каллаклар сони бўйича етакчи давлатлар:
- АҚШ — 1 770 (2022 йил январида 1 744 та эди);
- Россия — 1 674 (1 588);
- Франция — 280 (280);
- Буюк Британия — 120 (120).
Ҳисоботга кўра, Россияда сақланаётган жанговар каллаклар сони 2 814 та, АҚШда 1 938 тани ташкил этади. АҚШда жойлаштирилган ва сақланадиган каллакларнинг умумий сони ўзгармаган (3 708), Россияда эса бу кўрсаткич 4 477 тадан 4 489 тагача ошган. SIPRI маълумотларига кўра, Хитойнинг ядровий арсенали 2022 йилда 350 дан 410 тагача кўтарилган.
SIPRI Буюк Британия расмийларининг баёнотларига асосланиб, мамлакатда жанговар каллаклар сони ошишини кутмоқда. Бироқ мамлакат жойлаштирилган қуроллар ҳақидаги маълумотларни оммага ошкор қилишни тўхтатган эди. Франция учинчи авлод баллистик ракеталари, янги ҳаводан учириладиган қанотли ракета билан жиҳозланган ядро сувости кемасини яратиш устида ишламоқда.
Ҳиндистон ва Покистон ўтган йили ядровий арсеналларини кенгайтирди ва янги таъминот тизимларини ишлаб чиқишда давом этди. Мисол учун Нью-Деҳли узоқ масофали, жумладан, Хитойдаги нишонларга зарба бера оладиган тизимларни яратиш устида ҳам ишламоқда.
Шимолий Корея 2022 йилда ядро синовларини ўтказмаган, бироқ 90 дан ортиқ ракета синовларини амалга оширган. Отилган ракеталарнинг бир қисми ядро каллаклари билан жиҳозланган бўлиши мумкин. SIPRI маълумотларига кўра, КХДР 30 та жанговар каллак ишлаб чиқарган ва уларнинг сонини 50-70 тага етказиш учун зарур материалларга эга. Ядро қуроли борлигини расман тан олмайдиган Исроил, мутахассисларнинг фикрича, ўз арсеналини модернизация қилмоқда.
Изоҳ (0)