Бирлашган демократик партиядан номзод Ли Чже Мён Жанубий Кореядаги навбатдан ташқари президентлик сайловларида ғалаба қозонди. Бу ҳақда Yonhap ахборот агентлиги хабар бермоқда.
Таъкидланишича, Лининг ғалабаси 2022 йилги аввалги сайловларда собиқ президент Юн Сок Ёлдан атиги 1 фоизлик фарқ билан мағлубиятга учраганидан сўнг эътиборга лойиқ қайтиш бўлди.
Маълумотларга кўра, 98,56 фоиз сайлов бюллетенлари қайта ишлангандан сўнг, мухолифат номзоди Ли Чже Мён 49,25 фоиз овозни қўлга киритган. Унинг рақиби, ҳукмрон консерватив “Фуқаролик кучи” партиясидан номзод Ким Мун Суга эса фуқароларнинг 41,40 фоизи овоз берган.
Сайловлар 3 июнь куни ўтказилди. Президентлик учун асосий номзодлар Ли Чже Мён ва унинг бош рақиби, ҳукмрон консерватив “Фуқаролик кучи” партиясидан Ким Мун Су эди. Сайловлар якунланишига бир соат қолганида сайловчилар фаоллиги 28 йил давомидаги рекорд даража — 77,8 фоизни ташкил этди.
Ли Чже Мён сайловолди дастурида Шимолий Корея билан алоқа каналларини қайта тиклаш ва Корея иқтисодиётини жонлантириш мақсадида Кореялараро ҳамкорликни ривожлантиришни ваъда қилганди. Шу билан бирга, агар сайланса, Пхеньяннинг “ассиметрик таҳдидларига жавоб бериш учун тайёргарликни” кучайтиришини таъкидлаганди.
Янги президентнинг таржимайи ҳоли
Жанубий Кореянинг бўлажак президенти 1964 йил 22 декабрда (расмий рўйхатга кўра, аслида 1963 йил 23 октябрда) Андон шаҳрида камбағал, кўп болали оилада туғилган. 1986 йилда Сеулдаги Чунг-Анг университетининг ҳуқуқшунослик коллежини тамомлаган. 1989 йилда юридик амалиётни бошлаган, 2005 йилда эса сиёсат билан шуғуллана бошлаган.
2006 йилда Соннам шаҳар ҳокими лавозимига номзодлигини қўйган, аммо муваффақиятсизликка учраган. 2010 йилдан 2018 йилгача икки муддат давомида Соннам шаҳар ҳокими лавозимида ишлаган.
У президентликка илк бор номзодини қўймаяпти. Таржимайи ҳолига кўра, Ли 2017 ва 2022 йилларда ҳам номзод бўлган.
Кореядаги ҳарбий ҳолат ва Юнга қарши импичмент
2024 йилнинг декабрида Жанубий Корея президенти Юн Сок Ёл мамлакатда ҳарбий ҳолат жорий этишга муваффақиятсиз уриниб кўрди. Шундан сўнг парламент уни исён кўтаришга уринганликда айблаб, давлат раҳбарига импичмент эълон қилди.
Юн 14 декабрдан (парламент унинг импичменти учун овоз берганидан) президентлик лавозимидан четлаштирилган. Унинг ўзи исёнга уриниш айбловларини рад этиб, ҳарбий ҳолат жорий этилиши “сиёсий жиҳатдан тасдиқланган қарор” эканини айтган. У давлатни фалаж қилган мухолифатдан ҳимоя қилиш учун шундай қарор қабул қилганди.
Аммо Юнни лавозимидан бутунлай четлатиш учун Конституциявий суднинг қарори керак эди. Бу вақт давомида Юн Сок Ёл расман Жанубий Корея президенти бўлиб қолган. Ҳарбий ҳолат эълон қилишга муваффақиятсиз уринганидан 4 ой ўтиб, Юн лавозимидан бутунлай четлаштирилган. Президент ўз қарори билан конституция, қонун устуворлиги ва демократия тамойилларини бузгани таъкидланган.
У исёнга уриниш айбловларини рад этган ва “сиёсий жиҳатдан текширилган қарори” давлатни мухолифатдан ҳимоя қилиш учун қабул қилинганини айтган. Унинг адвокатлари Конституциявий суддаги жараён “ноқонуний ва адолатсиз” бўлганини билдирган. Март ойида суд президент Юн Сок Ёлни ҳибсдан озод қилиб, унга қарши ҳибсга олиш ордерини бекор қилган эди.
Изоҳ (0)