Шимолий Корея етакчисининг синглиси Ким Ё Чжон 9 апрель куни Пхеньян ўзини ядровий давлат деб эълон қилганини айтди. У АҚШнинг ядровий арсенални йўқ қилиш ҳақидаги чақириқларини “мантиқсиз” ва “хомхаёл” деб атади. Бу ҳақда UPI хабар берди.
Агар кимдир бизнинг олдимизда ядро қуролини йўқ қилиш ҳақида очиқчасига гапирса ёки турли баҳоналар билан ‘ядро қуролсизлантириш’ деган аллақачон ўлган тушунчани тирилтирмоқчи бўлса, бу КХДР суверенитетини инкор этишнинг энг душманона ҳаракатидир, деди Ким.
Пхеньянга қарши ҳамкорлик
АҚШ давлат котиби Марко Рубио, Жанубий Корея ташқи ишлар вазири Чо Таэ-юл ва унинг япониялик ҳамкасби Ивая Такеши НАТО йиғилиши доирасида Брюсселда учрашди. Улар Шимолий Кореядан келаётган таҳдидга қарши уч томонлама ҳамкорлик масаласини муҳокама қилди.
Иттифоқчилар “КХДРнинг ядро ва ракета дастурларига биргаликда қарши курашиш ва унга қарши қўйилган санкциялар тизимини сақлаб қолиш ҳамда кучайтириш зарурлигини” айтди.
Агар улар чин дилдан ‘ядро қуролсизлантириш’ ҳақида бонг ураётган бўлишса, бу мутлақо мантиқсиз. КХДР ядро қуролига эга давлат сифатидаги мақоми олий ва асосий давлат қонунида абадий мустаҳкамланган, деди Ким Ё Чжон.
2022 йил сентябрь ойида Шимолий Корея ўзини расмий ядровий давлат деб эълон қилган ва ўзини ҳимоя қилиш мақсадида зарурат туғилганда ядро зарбаси бериш ҳуқуқини қонунлаштирган. КХДР раҳбари Ким Чен Ин бу қарорни “қайтариб бўлмайдиган” деб атаган ва конституцияга ядровий арсенални доимий ривожлантиришга оид ўзгартиришлар киритган.
АҚШ билан музокаралар қайта бошланиши мумкинми?
АҚШ президенти Дональд Трамп Ким билан ядро музокараларини тикламоқчи деган тахминлар мавжуд. Трамп биринчи президентлик даврида Шимолий Корея раҳбари билан уч бор учрашган. Бироқ бу дипломатик саъй-ҳаракатлар ядро келишувига олиб келмаган. Пхеньян эса ўз қурол дастурини жадаллаштирган. Трамп интервьюларидан бирида Ким Чен Ин билан яхши алоқада эканини айтганди.
Чегарадаги зиддият
Трампнинг президентликка қайтганидан бери Шимолий Корея қурол синовларини давом эттирмоқда. Жумладан, март ойида АҚШ ва Жанубий Корея қўшма ҳарбий машғулотлар ўтказганидан сўнг Пхеньян янги ракета тизимини синовдан ўтказди.
9 апрель куни кечқурун Корея ярим оролидаги ҳарбий чегарада зиддият юз берди. Тахминан ўн нафар қуролланган Шимолий Корея аскарлари демилитаризация зонаси ҳудудида ҳарбий чегара чизиғини қисқа вақтга бузиб ўтди. Жанубий Корея ҳарбийлари огоҳлантирувчи ўқ узгач, шимолий кореяликлар дарҳол орқага қайтган.
Изоҳ (0)