Россия президенти Владимир Путин 22 август куни мамлакат ядровий саноати маркази ва биринчи совет атом бомбасининг “ватани” ҳисобланган Саров шаҳрига ташриф буюрди. У ерда расмий жадвалда кўрсатилмаган махфий йиғилиш ўтказди. Бу ҳақда “Коммерсант” мухбири Андрей Колесников хабар қилди.
Мухбирнинг сўзларига кўра, йиғилишда 2018 йилда Путин тақдим этган ядровий двигателли “Буревестник” ракетасининг синовлари муҳокама қилинган. Уни 2025 йилда қуролланишга қабул қилиш эҳтимоли ҳақида ҳам гап кетган.
Саров аэропортида президентни Россия армияси Бош штаб раҳбари Валерий Герасимов ва “Росатом” раҳбари Алексей Лихачёв кутиб олган. Ташриф чоғида Путин СССР ядровий қуролининг “оталаридан бири” Юлий Харитон ҳайкали пойига гул қўйган.
Бу тадбирларнинг бари аслида асосий масаладан — “Буревестник” бўйича йиғилишдан эътиборни чалғитиш учун ташкил этилган, дейди россиялик мухбир.
Бир неча кун аввал Новая Земля оролида “Буревестник“ ёки НАТО таснифида ССC-Х-9 Skyfall деб аталувчи ракетанинг синовлари ўтказилиши керак эди. Ядро қуроли бўйича экспертлар сунъий йўлдош тасвирларига асосланиб шундай хулоса берган. Ғарб разведкаси ҳам ракета синови бўлиб ўтишини тасдиқлаган.
Синовлар 9–22 август оралиғига режалаштирилган эди. Шу кунларда Россия учувчилар учун бир нечта огоҳлантиришлар эълон қилиб, Новая Земля ҳудудидан узоқлашишни тавсия қилган.
Панково полигонидаги синов қандай якунлангани ҳозирча номаълум. Мидлбери халқаро тадқиқотлар институти (Калифорния) мутахассиси Жеффри Льюиснинг айтишича, ҳозир Новая Земляда “жиҳозлар йиғиштирилмоқда”.
У илгари ҳам сунъий йўлдош маълумотларига таянган ҳолда “Буревестник” учирилиши мумкинлигини тахмин қилганди. Льюиснинг таъкидлашича, эҳтимол ракета учирилган, балки синов муваффақиятсиз тугаган ёки умуман бекор қилинган, “ёки улар шунчаки таслим бўлган”.
Изоҳ (0)