АҚШ ва Жанубий Корея Ким Чен Ин режимига нуқта қўйиш билан таҳдид қилди

Шимолий Корея томонидан ҳар қандай ядро ҳужуми Ким Чен Иннинг режимига нуқта қўяди. Бу ҳақда АҚШ ва Жанубий Корея мудофаа вазирлари Ллойд Остин ва Ли Чжон Соп огоҳлантирди. Уларнинг сўзларига кўра, улар Пхеньяннинг номақбул хатти-ҳаракатларига «қатъий жавоб» кўрсатади.

«Вазир Остин ва мен тасдиқлаймизки, Шимолий Корея томонидан ҳар қандай ядровий ҳужум, шу жумладан, тактик ядро қуролининг қўлланилиши, номақбулдир ва Ким Чен Ин режимининг тугашига олиб келади», — деди Ли Чжон Соп Пентагонда хавфсизлик масалалари бўйича маслаҳатлашув мажлисидан кейин.

Ллойд Остин ва Ли Чжон Соп КХДР томонидан, Вашингтон ва Сеул фикрича, қитъалараро баллистик ракеталар учирилиши ва бошқа ракета синовларидан кейин йиғилиш ўтказган. Пентагон раҳбарига кўра, маслаҳатлашувлардан кейин у ва Ли Чжон Соп Vigilant Storm ўқув машқларини узайтиришга қарор қилган. Вазирлар АҚШ ва Жанубий Корея альянси «қоядек мустаҳкам бўлиб қолаётгани»ни қайд этди.

Жанубий Корея ва АҚШ КХДРни «ўзининг вайронкор йўлидан қайрилишга» чақирди.

Аввалроқ АҚШ Россия ва Хитой КХДРга ўз таъсирини ўтказиб, уни ядро синовлари ўтказиш фикридан қайтаришини истаётгани маълум бўлганди.

Пхеньян бир неча марта ракеталар учиргач, АҚШ БМТ Хавфсизлик кенгашига мурожаат қилиб, 4 ноябрь, жума куни Шимолий Корея бўйича мажлис ўтказишни сўраганди.

Эслатиб ўтамиз, аввалроқ КХДР сўнгги уч кун ичида тўртинчи марта Япон денгизига қарата ракета учирди, бу сафар Пхеньян учта қисқа масофали баллистик ракетани учирган.

Ракеталар парвозлари АҚШ ва Жанубий Кореянинг Vigilant Storm қўшма ҳарбий ҳаво машғулотлари фонида юз бермоқда, КХДР унга қарши чиққан. Машқлар 31 октябрь куни бошланган бўлиб, 4 ноябрга қадар давом этади. Манёврларга 240 дан ортиқ самолётлар, шу жумладан, Американинг такомиллаштирилган F-35А кўринмас қирувчилари жалб қилинган.

КХДР Сеул ва Вашингтоннинг мана шу ва бошқа машғулотлари сабабли, «Корея ярим ороли қизғин нуқтага айлантириб қўйилгани, у ерда ҳарбий кескинлик дунё бўйича энг кучли экани, минтақадаги хавфсизлик муҳити эса янада жиддийлашганини айтганди.

Октябрь ойида Шимолий Корея беш мартадан кўпроқ ракеталар учирди, шунингдек, қанотли ракеталарни синовдан ўтказди. Бундан ташқари, Жанубий ва Шимолий Корея ҳарбийлари ўртасида 24 октябрь куни отишма юз берди: КХДР кемаси Сариқ денгизда демаркация чизиғини кесиб ўтгани туфайли Сеул огоҳлантирувчи ўт очди, Пхеньян бунга жавобан баравар ўт очиш реактив тизимларидан 10 та снаряд учирди.