Шимолий Корея етакчиси Ким Чен Ин Жануб билан уруш бошлашга тайёр, бироқ Пхеньян ҳозир кўпроқ пул ишлашга ҳаракат қилмоқда. Бу ҳақда таҳлилчиларга таяниб, Bloomberg ёзди.
Нашр таъкидлаганидек, Шимолий Корея етакчиси Жанубий Кореяга очиқчасига уруш билан таҳдид қилган бўлса-да, унда можарони қўзғатмаслик учун жиддий сабаб бор — КХДР иқтисодиётининг ўсиш суръати Россияга қурол сотиш ортидан деярли ўн йилликлардаги энг юқори даражага етди.
“Октябрь ойидан бери Шимолий Корея Россияга 2 миллиондан ортиқ артиллерия снарядлари ва бир нечта баллистик ракеталарни сотди. Ракеталарнинг ҳар бирининг нархи бир неча миллион долларга етиши мумкин, Россия Пхеньяндан уларни учирадиган мосламалар ҳам сотиб олишга мажбур бўлмоқда. Шундай қилиб, КХДР сотган асбоб-ускуналар миллиардлаб долларга етиши мумкин, шунингдек, Хитой билан товар айирбошлаш ортиши билан бирга мамлакат иқтисодиёти жорий йилда 0,5 фоизга ўсиши мумкин”, — деб таъкидлайди нашр таҳлилчилари.
Bloomberg агентлигининг ёзишича, Пхеньяннинг Кремль агрессиясини қўллаб-қувватлаш учун баллистик ракеталар, артиллерия снарядлари ва бошқа ҳарбий техника сотиши узоқ вақтдан бери халқаро санкциялар остида қолган Шимолий Корея иқтисодиётига туртки бермоқда.
“Бу Ким Чен Инга келгуси йиллар давомида Ғарб билан мулоқот қилишдан қочиш имконини бериши мумкин, шунингдек, 40 ёшли раҳбарга уруш сингари кескин чоралар кўришга босимни камайтиради”, — деб ёзади Bloomberg.
Шимолий Корея ва Россия ўртасидаги ҳамкорлик чуқурлашиши кутилмоқда, Путин яқин ойларда Пхеньянга ташриф буюриши мумкин.
Изоҳ (0)