Путин йигирма тўрт йил ичида илк бор Шимолий Кореяга ташриф буюради

Россия президенти Владимир Путин яқин ҳафталарда Шимолий Корея ва Вьетнамга ташриф буюриши кутилмоқда. Бу ҳақда “Ведомости” хабар берди.

Россиянинг Шимолий Кореядаги элчиси Александр Матсэгора Путиннинг Пхеньянга ташрифига фаол тайёргарлик кўрилаётганини тасдиқлаган.

Вьетнамга сафар КХДР президенти ташрифидан сўнг дарҳол июнь ойида бўлиши мумкин,  — дейилади хабарда.

Бунгача Россия президенти ёрдамчиси Юрий Ушаков Путин 3-4 июль кунлари бўлиб ўтадиган Шанхай ҳамкорлик ташкилотининг Остона саммитида иштирок этиш ниятида эканини маълум қилганди. Ушаковга кўра, бошқа ташрифлар ҳақида гапиришга ҳали эрта, лекин улар албатта содир бўлади.

Путин ҳокимиятдаги 24 йиллик фаолияти давомида Шимолий Кореяга фақат бир марта, 2000 йилда биринчи президентлик муддати бошланганда ташриф буюрган. КХДРнинг амалдаги раҳбари Ким Чен Ин Россияга охирги марта ўтган йилнинг сентябрида ташриф буюрган эди.

Путин Вьетнамга тўрт марта ташриф буюрган – охиргиси 2017 йилнинг ноябрида, мамлакатда APЭК саммити бўлиб ўтган эди. У ерда Россия президенти АҚШнинг ўша пайтдаги президенти Дональд Трамп билан учрашган, шунингдек, Япониянинг собиқ бош вазири Синдзо Абэ ва Хитой раҳбари Си Цзиньпин билан музокаралар ўтказган. Путиннинг Ветнамга сўнгги расмий ташрифи 2013 йилнинг ноябрида бўлиб ўтган.

Шимолий Корея Украинага қарши урушда Россияни қурол-яроғ билан қўллаб-қувватламоқда. Пхеньян Москвага ўқ-дорилар ва бошқа ҳарбий техникалар солинган жами 7 мингга яқин контейнерни топширган,  — деди Жанубий Корея мудофаа вазири Шин Вон Сик.

Унга кўра, Россия армияси Шимолий Кореядан 3 миллион 152 мм га яқин снаряд олиши мумкин. Ҳарбий ёрдам эвазига Россия КХДРга 9 мингдан ортиқ контейнерни бошқа товарлар билан етказиб берган.