Исроил кучлари Фаластиннинг босиб олинган Арура, Абвейн шаҳарларида ва Рамалла яқинидаги Нубани фермалари ҳудудида кенг кўламли ҳарбий операция ўтказди. Бу ҳақда Фаластин ахборот маркази хабар бермоқда.
Манба маълумотларига кўра, ҳарбийлар қидирув ишлари олиб борган, аҳолини ҳибсга олган ва биноларни эгаллаб олган. Айрим ҳолларда уй эгалари мажбуран кўчириб юборилган, бинолар эса вақтинчалик ҳарбий базаларга айлантирилган.
Маҳаллий манбаларнинг маълум қилишича, шаҳарларга кириш йўллари тўсиб қўйилган, ҳаракатланиш чеклангани ва турар жой ҳудудларида ҳарбий кучлар сони оширилган.
Таъкидланишича, Эронга ҳаво ҳужумлари бошланиши билан Исроил ҳарбийлари Хеврон, Женин, Рамаллоҳ ва Калкилиядаги ўнлаб уйларни эгаллаб, оилаларни мажбуран кўчирди ва у ерларга аскарларни жойлаштирди. Аҳоли ва фаоллар фикрича, бунинг мақсади ҳарбийларни Эроннинг эҳтимолий зарбаларидан ҳимоя қилиш бўлиши мумкин — аскарлар нишонга айланмаслик учун тинч аҳоли орасида яширинмоқда.
Фаоллар армияни фаластинликлардан тирик қалқон сифатида фойдаланишда айбламоқда — Исроил ҲАМАСни айнан шу амалиётда айблаган эди. Халқаро ҳуқуқ буни тақиқлашига қарамай, Youth Against Settlements ҳуқуқни ҳимоя қилиш гуруҳининг таъкидлашича, “фаластин болалари ҳаётидан кўра, армия хавфсизлигига устуворлик берилмоқда”.
Исроил 13 июнга ўтар кечаси Эроннинг ядро дастурига қарши “Исёнкор шер" операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)