АҚШ собиқ президенти Билл Клинтон Исроил бош вазири Биньямин Нетаньяху Эронга қарши уруш олиб бориш орқали ҳокимиятда узоқ қолишга интилаётганини айтди. У амалдаги президент Дональд Трампни Яқин Шарқдаги вазиятни юмшатишга чақирди. Бу ҳақда New York Post хабар берди.
Ҳозиргача АҚШ урушга бевосита аралашмаган, бироқ Теҳрондан учирилган ракеталарни уриб туширишда Исроилга ёрдам кўрсатган. Трамп маъмурияти можарога янада фаол аралашиш эҳтимолини кўриб чиқмоқда.
Жаноб Нетаньяху узоқ вақтдан бери Эронга қарши уруш очишни хоҳлайди, чунки бу орқали у ҳокимиятда абадий қолиши мумкин. Айтиш мумкинки, у сўнгги 20 йилнинг аксариятида бош вазир бўлиб ишлаган. Аммо биз бу вазиятни юмшатишга ҳаракат қилишимиз керак, президент Трамп шундай қилади деб умид қиламан, деди демократлар партиясидан чиққан собиқ президент Клинтон.
Унинг таъкидлашича, Трамп ҳам Нетаньяху каби фаластинликлар алоҳида давлатга эга бўлмаслиги керак, деган фикрга қўшилади.
Аввало, улар Яқин Шарқда тинчлик музокараларини олиб бориш ҳақида гапирмаяпти, чунки бош вазир Нетаньяху раҳбарлигидаги Исроил фаластинликларга давлат бериш ниятида эмас. Энди эса фаластинликлар шу қадар бўлинган ва эзилганки, ўзлари ҳам бирлашиб, бунга эриша олмаяпти, деди Клинтон.
У АҚШнинг Яқин Шарқдаги иттифоқчиларини ҳимоя қилиш зарурлигини айтиб, эҳтиёткорликка ҳам чақирди.
Биз минтақадаги дўстларимизни уларнинг ёнида эканимизга ва уларни ҳимоя қилишга тайёрлигимизга ишонтиришимиз керак. Бироқ сиёсий жиҳатдан бетараф бўлган ва шунчаки ҳаёт кечиришни истаган тинч аҳолига қарши олиб борилаётган эълон қилинмаган урушлар — яхши ечим эмас, таъкидлади у.
Клинтон АҚШ Эроннинг ядро қуролига эга бўлишига йўл қўймаслиги кераклигини тан олди. Бироқ бегуноҳ инсонлар ҳаётини асраш биринчи ўринда туриши кераклигини қайд этди.
Эронни ядро қуролига эга бўлишдан тўхтатишга уринишимиз керакми? Менимча, ҳа. Лекин ўзини ҳимоя қила олмайдиган ва шунчаки яшаш имкониятини хоҳлаётган тинч аҳолини доимий равишда ўлдиришга ҳожат йўқ, дея хулоса қилди Клинтон.
Изоҳ (0)