АҚШ томонидан Исроилнинг Яқин Шарқдаги ҳаракатлари қўллаб-қувватланиши халқаро тинчликка эришиш йўлидаги асосий муаммога айланди.
Бу ҳақда Эрон ташқи ишлар вазири Аббос ар-Ақчий суриялик ҳамкасби Бассам ас-Саббоғ билан ўтказилган матбуот анжуманида маълум қилди.
“Афсуски, БМТ Хавфсизлик кенгаши халқаро тинчлик ўрнатиш бўйича ўзининг асосий вазифасини фақат бир давлат, яъни АҚШ Исроилни бор кучи билан қўллаб-қувватлагани учунгина бажара олмаяпти”, деди ар-Ақчий.
“Сионистик режимга босимни кучайтириш ва унинг жиноятларини тўхтатиш учун минтақа, араб ва ислом дунёсидаги бирдамлик жуда муҳим. Бу саъй-ҳаракатлар асосан самарали бўлди, лекин Исроил режимининг Ғазо сектори ва Ливандаги жиноятларини, шунингдек, Сурияга ҳужумларини тўхтата олмади”, дея қўшимча қилди дипломат.
Аввалроқ АҚШнинг сайланган президенти Дональд Трамп Оқ уйга қайтиши билан Исроилни қўллаб-қувватлашни кучайтириши мумкинлиги хабар қилинганди.
“Чунки у ўз маъмуриятидаги асосий лавозимларга ашаддий исроилпараст қарашлари билан танилган шахсларни тайинлашни таклиф қилган”, дея ёзди The Washington Post.
Унга кўра, АҚШнинг Исроилдаги элчиси бўлиши мумкин бўлган Арканзас штатининг собиқ губернатори Майк Ҳаккаби Ғарбий Соҳилни Исроил томонидан босиб олиниши тарафдори. Трамп томонидан Мудофаа вазири лавозимига таклиф қилинган америкалик телебошловчи, Афғонистон ва Ироқдаги урушлар фахрийси Пит Ҳегсет Фаластин давлатчилигига қарши фикрларни кўп бора билдирган.
АҚШ Миллий разведкасининг собиқ директори, Марказий разведка бошқармасининг (CIA) эҳтимолий янги раҳбари Жон Рэтклифф ҳам Исроилнинг ашаддий тарафдори.
The Washington Post нашрнинг қайд этишича, исроиллик сиёсатчилар Трампнинг сайловдаги ғалабасидан хурсандчиликларини яширмаяпти ва республикачилар даврида Исроилнинг АҚШ томонидан қўллаб-қувватланиши ортишига умид қилишмоқда.
Унинг фикрича, Ғазо секторидаги гуманитар фалокат ва тинч аҳолининг қурбон бўлаётгани Исроилга ҳарбий ёрдамни давом эттиришга тўсқинлик қилмаслиги керак.
Изоҳ (0)