Америка раҳбарияти яқин кунларда Эронга зарба бериш имкониятини жиддий кўриб чиқмоқда. Бу ҳақда манбаларга таяниб Bloomberg хабар берди.
Операция 21—22 июнь, дам олиш кунлари бўлиб ўтиши мумкин. Бир нечта федерал агентликларнинг юқори мартабали амалдорлари эҳтимолий ҳужумга тайёргарликни бошлаган. Бироқ вазият доимий равишда ўзгариб тургани сабабли қарорлар қайта кўриб чиқилиши мумкин.
Ҳужум кечиктирилиши АҚШ президенти Дональд Трамп муросага тайёр деган сигнални етказиши мумкин. Бундай ҳолда муроса Эрон ядро дастурини қисқартириш ва уранни бойитиш қувватларининг бир қисмидан воз кечишни англатади, дейилади хабарда.
CBS News нашри Пентагондаги манбалари ва разведка маълумотларига таяниб хабар беришича, Трамп Эроннинг Фордодаги ядровий объектига авиазарба бериш имкониятини дастлабки тарзда маъқуллаган. Бироқ якуний қарорни ҳали қабул қилмаган.
Оқ уй раҳбари операциянинг эҳтимолий хатарлари ҳақида хабардор қилинган. Президент Фордодаги заводнинг ишдан чиқишини Эроннинг ядровий қурол яратишига йўл қўймаслик учун зарур қадам деб ҳисоблайди.
Шуни таъкидлаш керакки, АҚШ разведкаси ва МАГАТЕ раҳбари Эрон ядро қуроли яратаётганига оид далилларни топмаган. Исроил эса ядро қуроли яратилаётгани даъвоси билан Ислом республикасига ҳужумлар қилмоқда.
Изоҳ (0)