АҚШ ҳукумати Фаластин давлатининг йўл харитаси параметрларини белгилаш ҳамда Исроил хавфсизлигини кафолатлаш бўйича келаси ҳафта Нью Йоркда бўлиб ўтадиган БМТ анжуманини танқид қилди. Шунингдек унда қатнашаётган давлатларни оқибатлардан огоҳлантирди.
Эътиборлиси, мазкур тадбир Қўшма Штатларнинг энг яқин иттифоқчилари ҳисобланган Франция ва Саудия Арабистони ҳамкорлигида ташкил этилмоқда.
“Биз ҳукуматларни ушбу анжуманда иштирок этмасликка чақирамиз, чунки уни Ғазо урушини тўхтатиш ва гаровга олинганларни озод қилиш бўйича ҳаётий муҳим саъй-ҳаракатларга зид, самарасиз ҳаракат деб биламиз", дейилади АҚШ томонидан юборилган дипломатик телеграммада.
Аввалроқ Франция президенти Эммануэл Макрон Исроил томонидан босиб олинган ҳудудларда Фаластин давлати тан олиш имкониятини очиқ айтиб ўтган эди. Бу Тель-Авив, жумладан Нетаньяху томонидан кескин танқидлар билан қабул қилинган.
“АҚШ, бир томонлама тарзда, ҳали мавжуд бўлмаган, шартли Фаластин давлатининг тан олиниши ҳаракатларига қарши. Бундай қадам можарони якунлашда жиддий ҳуқуқий ва сиёсий тўсиқлар яратади, уруш вақтида Исроилга босим ўтказади ва натижада унинг душманларига фойда келтиради”, дейилади дипломатик мактубда.
Қўшма Штатлар 1990 йиллардан буён Фаластин ва Исроил учун икки давлат ечимни риторик даражада қўллаб-қувватлаб келади. Унга кўра, Ғазо ва Ғарбий Соҳилда Фаластин давлати ташкил этилади. Исроил эса 1967 йилги халқаро тан олинган чегараларга қайтади.
Бироқ Дональд Трампнинг биринчи президентлик даврида Оқ уй мазкур тамойилдан чекинди. Қўшма Штатларнинг Тель-Авивдаги элчихонаси Қуддус шаҳрига кўчирилгани бунга кўплаб мисоллардан биридир. Аммо у Оқ уйга қайтганидан қарийб 5 ой ўтган бўлса-да, ҳозирча “Икки давлат ечими” масаласида аниқ позиция билдиргани йўқ. Лекин Трамп томонидан Исроилга тайинланган элчи Майк Ҳакаби “мустақил Фаластин давлати эндиликда АҚШ ташқи сиёсатининг амалдаги мақсади бўлмаслиги мумкин”, деб айтди.
Вашингтон томонидан халқаро анжуман иштирокчиларига юборилган дипломатик телеграмманинг 7 октябрь воқеаларига оид қисми, айниқса, баҳс-мунозараларни келтириб чиқарди.
“Агар Фаластин давлати бир томонлама тан олинса, бу 7 октябрь кунини Фаластин мустақиллик кунига айлантирган бўларди”, дейилади унда.
АҚШ бу анжуманни Фаластин давлатининг бир томонлама тан олинишига олиб келувчи хавфли дипломатик қадам деб ҳисобламоқда. Шунингдек халқаро тадбир Ғазода урушни тугатишга қаратилган саъй-ҳаракатларга зарар етказиши мумкинлигини иддао қиляпти. Шу боис келаси ҳафта Нью-Ёркда бўлиб ўтадиган анжуманда дипломатик кескинлик кучайиши эҳтимолдан ҳоли эмас.
Изоҳ (0)