Франция президенти Эммануэл Макрон яқин ойларда унинг мамлакати Фаластин давлатини тан олиши мумкинлигини айтди. Бу ҳақда Al Jazeera хабар берди.
Макрон бу қарорни БМТнинг Исроил-Фаластин можароси бўйича конференциясида якунлашни мақсад қилганини айтди. Конференцияга июнь ойида Франция ва Саудия Арабистони ҳамраислик қилади.
Биз тан олиш сари қадам ташлашимиз керак ва буни келгуси ойларда амалга оширамиз. Мен буни бировни рози қилиш учун қилмаяпман. Мен буни қачондир тўғри бўладиган вақт келганда қиламан, деди сиёсатчи.
Фаластин ташқи ишлар вазири Варсен Агабекян Шаҳин бу “Фаластин халқи ҳуқуқларини ҳимоя қилиш ва икки давлат ечимига мувофиқ тўғри йўналишдаги қадам” бўлишини айтди.
Исроил ташқи ишлар вазири Гидеон Саар эса Фаластин давлатининг ҳар қандай “бир томонлама тан олиниши” “ҲАМАС учун рағбат” бўлишини билдирди.
Ҳар қандай давлат томонидан мавҳум Фаластиннинг “бир томонлама тан олиниши”, ҳаммамизга маълум ҳозирги вазиятда, терроризм учун мукофот ва ҲАМАС учун рағбат бўлади. Бундай ҳаракатлар минтақамизда тинчлик, хавфсизлик ва барқарорликни яқинлаштирмайди, аксинча уларни янада узоқлаштиради, деб ёзди у Х ижтимоий тармоғида.
Фаластин ҳозиргача БМТнинг 193 аъзосидан 146 таси томонидан суверен давлат сифатида тан олинган, 2024 йил уларнинг сафига Арманистон, Словения, Ирландия, Норвегия, Испания, Багам ороллари, Тринидад ва Тобаго, Ямайка ва Барбадос қўшилган.
Бироқ Фаластин давлатчилигини халқаро миқёсда қўллаб-қувватлаш ортиб бораётганига қарамай, АҚШ, Австралия, Буюк Британия ва Германия каби бир қатор йирик Ғарб давлатлари уни тан олишдан бош тортган.
Макрон Яқин Шарқдаги баъзи давлатларга Исроил давлатини ўз навбатида тан олиш имконини берувчи “жамоавий динамика”ни олдиндан кўрганини айтди. Исроилни тан олмайдиган давлатлар қаторига Саудия Арабистони, Эрон, Ироқ, Сурия ва Яман киради.
Франция президенти айтишича, Фаластинни давлат сифатида тан олиш Францияга “Исроилнинг мавжуд бўлиш ҳуқуқини инкор этувчиларга қарши курашда аниқ бўлиш ва минтақада коллектив хавфсизликни таъминлаш мажбуриятини олиш имконини беради”.
Франция узоқ вақтдан бери Исроил-Фаластин можаросини икки давлат ечими орқали ҳал қилиш тарафдори бўлиб келган. 2023 йил 7 октябрда ҲАМАСнинг Исроилга ҳужумидан кейин ҳам ўз сиёсатини давом эттирган.
Аммо Франциянинг Фаластин давлатини расман тан олиши муҳим сиёсий ўзгариш бўлиб, бу Исроилнинг бундай ҳаракатларни эрта деб ҳисоблашига қарамай, унга қарши туришга олиб келиши мумкин.
Яқинда Мисрга ташрифи чоғида Макрон президент Абдулфаттоҳ ас-Сиси ва Иордания қироли Абдулла II билан музокаралар ўтказиб, Ғазо ва Исроил томонидан босиб олинган Ғарбий Соҳилнинг ҳар қандай кўчирилиши ёки аннексия қилинишига қатъиян қарши эканини айтганди.
Изоҳ (0)