АҚШнинг сайланган президенти Дональд Трамп Оқ уйга қайтиши билан Исроилни қўллаб-қувватлашни кучайтириши мумкин, чунки у ўз маъмуриятидаги асосий лавозимларга ашаддий исроилпараст қарашлари билан танилган шахсларни тайинлашни таклиф қилган. Бу ҳақда The Washington Post (WP) ёзмоқда.
Унга кўра, АҚШнинг Исроилдаги элчиси бўлиши мумкин бўлган Арканзас штатининг собиқ губернатори Майк Хаккаби Ғарбий Соҳилни Исроил томонидан босиб олиниши тарафдори. Трамп томонидан Мудофаа вазири лавозимига таклиф қилинган америкалик телебошловчи, Афғонистон ва Ироқдаги урушлар фахрийси Пит Хегсет Фаластин давлатчилигига қарши фикрларни кўп бора билдирган.
АҚШ Миллий разведкасининг собиқ директори, Марказий разведка бошқармасининг (CIA) эҳтимолий янги раҳбари Жон Ретклифф ҳам Исроилнинг ашаддий тарафдори.
Унинг фикрича, Ғазо секторидаги гуманитар фалокат ва тинч аҳолининг қурбон бўлаётгани Исроилга ҳарбий ёрдамни давом эттиришга тўсқинлик қилмаслиги керак.
Исроил Трампнинг ғалабасидан хурсанд
Нашрнинг қайд этишича, исроиллик сиёсатчилар Трампнинг сайловдаги ғалабасидан хурсандчиликларини яширмаяптилар ва республикачилар даврида Исроилнинг АҚШ томонидан қўллаб-қувватланиши ортишига умид қилишяпти.
Трамп АҚШ президенти сифатидаги биринчи муддатида Исроилни Эрон таҳдидидан ҳимоя қилишда ёрдам беришини қайта-қайта эълон қилганди. У босиб олинган Голан тепаликлари устидан Исроил суверенитетини тан олди, АҚШ элчихонасини Тель-Авивдан Қуддусга кўчирди ва бир қатор араб давлатлари билан Исроилнинг муносабатларини нормаллаштирган келишувларга кўмаклашди.
Илон Маск ҳам Трамп администрациясида
Аввалроқ америкалик миллиардер Илон Маск ва тадбиркор Вивек Рамасвами сайланган президент Дональд Трамп даврида давлат самарадорлигини ошириш бўйича янги департаментга раҳбарлик қилиши хабар берилганди.
“Биргаликда бу икки ажойиб америкалик менинг маъмуриятим учун давлат бюрократиясини демонтаж қилиш, ортиқча қоидаларни, керакциз харажатларни камайтириш ва федерал агентликларни қайта ташкил этиш йўлини очиб беради”, деди Трамп.
Бизнесмен Илон Маск АҚШнинг сайланган президенти Дональд Трампнинг тарафдори ҳамда донори бўлган. 5 октябрь куни у Трампнинг Пенсилваниядаги сайловолди митингида нутқ сўзлаган. Миллиардер “Америкада конституция ва демократияни сақлаб қолиш учун” Трамп ғалаба қозониши кераклигини айтган.
Трамп 20 январдан ишга киришади
Трамп 5 ноябрь куни бўлиб ўтган сайловда ғалаба қозонди. У Демократлар вакили, АҚШ вице-президенти Камала Ҳаррисни мағлуб этди. Республикачилар АҚШ Конгресси Сенати устидан ҳам назоратни ўз қўлларига олишга муваффақ бўлишди.
Трамп 2025 йил 20 январдаги инаугурациядан сўнг АҚШ президенти лавозимини эгаллайди.
Изоҳ (0)