Туркия президенти Ражаб Тоййиб Эрдўғон Исроилнинг Эронга ҳужум қилиш имконияти Ғарбнинг уни ҳаддан ташқари қўллаб-қувватлаши ва Исроил нима қилаётганини тушунмаслиги оқибатида юзага келганини билдирди.
“Ғарбнинг чексиз кўмагига таяниб, Эронга ҳужум қилаётган, Ғазони вайрон этаётган ва минтақадаги барча давлатларни менсимайдиган Исроил ўз қилмишларининг оқибатини англамаяпти. Эҳтимол, келажакда у ўз хатосини тушуниб етади, аммо биз жуда кеч бўлишидан хавотирдамиз.
Ҳеч бир мамлакат ўз чегаралари доирасида қолиб кетмайди. Минтақадаги ҳар бир воқеа барча жамиятларга таъсир кўрсатиб, ўрта ва узоқ муддатли оқибатларга олиб келади. Фаластин халқи ва унинг ерига қилинган тажовуз бир неча миллион киши билан чекланиб қолмайди. Эронга қилинган ҳужум ҳам фақат Эронга тааллуқли эмас”, деди Туркия раҳбари Вазирлар Маҳкамаси йиғилишидан сўнг миллатга қилган мурожаатида.
Исроил 13 июнга ўтар кечаси Эронга қарши ҳарбий операция бошлади ва уни қайтариб бўлмас нуқтага яқинлашган махфий ҳарбий-ядровий дастурни амалга оширишда айблади. Ҳаво ҳужумлари ва қўпорувчи гуруҳлар рейдларининг нишонлари атом объектлари, генераллар, таниқли ядро физиклари, авиабазалар, ҳаво мудофааси воситалари ва “ер-ер” турдаги ракеталар бўлди.
Ўз атом лойиҳасининг ҳарбий мақсадларга йўналтирилганини инкор этаётган Эрон ракета зарбалари ва ҳужумкор дронларни учириб жавоб қайтармоқда. Теҳронда зарбалар нишони сифатида Исроилнинг ҳарбий ва ҳарбий-саноат объектлари кўрсатилмоқда. Ҳар икки томондан ҳам турар жой биноларига етказилаётган зарар ва тинч аҳоли орасидаги қурбонлар сони ортиб бормоқда.
Исроил маълумотларига кўра, Эрон зарбаларидан 20 дан ортиқ киши ҳалок бўлган, 600 дан зиёд киши жароҳат олган. Эрон эса 220 дан ортиқ ҳалок бўлган ва 1200 дан зиёд жабрланганлар ҳақида хабар бермоқда.
Исроил ва Эрон кунига бир неча бор ўзаро зарба алмашмоқда. Исроил Эроннинг ядро дастури йўқ қилинмагунча кампанияни давом эттиришга ваъда бермоқда, Эрон эса ўз навбатида Исроил бомбардимонни тўхтатмагунча ҳужумларни давом эттириш билан таҳдид қилмоқда.
Изоҳ (0)