Эрон ташқи ишлар вазири Аббос Арағчи Исроил билан ҳарбий ҳаракатлар бошланганидан кейин АҚШнинг Яқин Шарқдаги махсус элчиси Стив Уиткофф билан бир неча марта телефон орқали гаплашган. Бу ҳақда Reuters агентлиги бир нечта номи ошкор этилмаган дипломатларга таяниб маълум қилган.
Уларнинг айтишича, биринчи телефон қўнғироғи Вашингтон ташаббуси билан амалга оширилган. Унда АҚШ махсус элчиси Яқин Шарқдаги можарони ҳал этиш бўйича янги таклиф билдирган. Бундан ташқари, Арағчи ва Уиткофф жаноблари АҚШнинг май ойи охирида Эронга берган таклифини муҳокама қилишган. Бу таклиф Эрондан ташқарида уранни бойитиш бўйича минтақавий консорсиум тузишни назарда тутади. Теҳрон ҳозиргача бу таклифни рад этиб келаётган эди.
Агентлик манбаларининг таъкидлашича, сўнгги музокаралар шу ҳафта ўтказилган. Уларнинг сўзларига кўра, бу суҳбат апрель ойида икки мамлакат ўртасидаги музокаралар бошланганидан бери энг мазмунли бўлган. Арағчи АҚШ махсус элчисига, агар АҚШ Исроилга ҳужумларни тўхтатиш учун босим ўтказса, Эрон “ядро масаласида мослашувчанлик кўрсатиши мумкинлигини” айтган. Шунингдек, акс ҳолда Теҳрон музокараларга қайтмаслигини қўшимча қилган.
Таъкидлаш жоизки, Эрон АҚШ билан ислом республикасининг ядро дастури бўйича беш босқичли музокаралар ўтказган. Томонларнинг 15 июнга режалаштирилган учрашуви бекор қилинган, чунки бундан икки кун олдин Исроил Эроннинг ядровий ва мудофаа саноати объектларига қарши “Исёнкор шер” операциясини бошлаган эди. Шундан сўнг Эрон ва Исроил ўртасида ўзаро ҳужумлар бошланган.
Изоҳ (0)