Ғазо сектори бўйлаб Исроил ҳужумлари оқибатида 19 июнь куни 92 киши ҳалок бўлди. Бу ҳақда Al Jazeera хабар берди.
19 июнь тонгидан бери ҳалок бўлганларнинг 64 нафари Ғазо шаҳри ва шимолида, яна 16 нафари Ғазонинг шимоли ва жанубини ажратиб турувчи Нетзарим йўлаги яқинида ёрдам кутиб турган эди.
Оч фаластинликлар ҳар куни АҚШ ва Исроил томонидан қўллаб-қувватланадиган Ғазо гуманитар жамғармасидан ёрдам олиш учун ҳудудга тўпланади. Бирлашган Миллатлар Ташкилоти ёрдамни “қуролга айлантиргани” учун ҒГЖни қоралаган. Ёрдам кўрсатиш объектида Исроил ҳужумига гувоҳ бўлган Бассам Абу Шаарнинг айтишича, одамлар озиқ-овқат олиш умидида тунда тўпланган эди.
“Тунги соат 1 ларда бизга қарата ўқ уза бошлашди. Отишма танклар, самолётлар ва квадрокоптер бомбаларидан кучайиб кетди. Биз уларга ёрдам бера олмадик. Ҳатто ўзимиз ҳам қочиб қутула олмадик”, деди у.
Сўнгги ҳафталарда Исроилнинг озиқ-овқат ёрдами олишга уринаётган фаластинликларга ҳужумлари кўпайиб, ўнлаб одамлар ҳалок бўлган. Al Jazeera телеканали мухбири Тареқ Абу Аззумнинг айтишича, ёрдам кўрсатиш жойларида одамларга ҳужум қилиш “кундалик одат”га айланиб бормоқда.
Исроил ҳарбийларининг маълум қилишича, кучлар гумонланувчиларга уларга яқинлашишига йўл қўймаслик учун огоҳлантирувчи ўқ узган. Бундан ташқари, Исроил дрони Ал-Шати қочқинлар лагерида фаластинликлар электр қурилмаларини зарядлаётган чодирга ҳужум қилиб, 13 кишини ўлдирган. Шунингдек, Исроил самолёти Ғазо шимолидаги Жабалия шаҳрида интенсив ҳаво ҳужумлари уюштириб, бир нечта уйларни бомбардимон қилган.
Ўтган кун давомида қамалдаги шифохоналарга 69 жасад олиб келингани ва 221 ярадор ётқизилгани очиқланган. Ғазо Соғлиқни сақлаш вазирлиги маълумотларига кўра, 2023 йил октябрь ойида уруш бошланганидан бери камида 55 706 киши ҳалок бўлган ва 130 101 киши яраланган.
Изоҳ (0)