Халқаро жиноий суднинг (ХЖС) Исроил бош вазири Бенямин Нетаньяху ва собиқ мудофаа вазири Йоав Галантни ҳибсга олишга ордер бериш ҳақидаги қарорига жавобан Исроил суверенитетини Ғарбий соҳилгача узайтириш таклиф қилинди. Мазкур таклифни Исроилнинг ўта ўнгчи Миллий хавфсизлик вазири Итамар Бен-Гвир илгари сурди.
“Ушбу ҳибсга олиш ордерларига жавобан Яҳудия ва Самариянинг (Ғарбий соҳил) бутун ҳудудига суверенитетни кенгайтириш, Ғарбий соҳилдаги Фаластин миллий маъмурияти билан алоқаларни узиш, шунингдек, санкциялар қўллаш лозим”, деб ёзди Бен-Гвир Telegram’даги каналида.
Аввалроқ ХЖС Нетаньяху ва Галантни Ғазодаги ҳарбий жиноятларда айбланиб ҳибсга олишга ордер берган эди. Қарор 2023 йил 8 октябрдан 2024 йил 20 майга қадар содир этилган “инсониятга қарши жиноятлар ва ҳарбий жиноятлар” юзасидан қабул қилинган.
Суд, шунингдек, Исроилнинг ўз фуқароларига қарши ордер бериш бўйича суд юрисдикциясига эътироз билдирмоқчи бўлган далилларини ҳам рад этган. Исроил ҳам Фаластиндаги вазият билан боғлиқ ишлар бўйича ХЖС юрисдикциясига қарши чиқди.
Аксарият исроиллик сиёсатчилар ва турли сиёсий арбоблар бу қарорни кескин қоралади.
Исроил президенти Исаак Герцог ХЖКнинг ордер бериш ҳақидаги қарорини “виждонга тўғри келмайдиган ва ҳайратга соладиган” деб атади.
“Бу қарор демократия ва эркинликдан кўра террор ва ёвузлик фойдасига танлов бўлиб, адлия тизимининг ўзини ҲАМАСнинг инсониятга қарши жиноятлари учун қалқонга айлантирди”, деди у.
Нетаньяху идорасининг маслаҳатчиси Дмитрий Генделман ХЖСни Исроил позициясига эътибор бермаганликда ва Эрон бошлаган минтақадаги урушни қўллаб-қувватлаганликда айблади.
“ХЖК антисемитизм оҳанглари билан тўлиқ дезинформация кампаниясини қўллаб-қувватлашга қарор қилди, унинг мақсади Исроилни ўз иттифоқчиларидан ажратиб қўйиш ва мамлакатимизга қарши террорчилик ҳужумларига кўмаклашишдан иборат”, дейди Генделман.
Изоҳ (0)